اسلام آباد : پولیس نے ای الیون میں لڑکے اور لڑکی پرتشدد و برہنہ کرنے کی ویڈیو اپ لوڈ کرنے والے کی تلاش کیلئے ایف آئی اے سائبرکرائم سے رابطہ کرلیا۔
تفصیلات کے مطابق اسلام آباد پولیس کو ای الیون میں جوڑے پر تشدد اور برہنہ کرنے سے متعلق کیس میں ویڈیو اپ لوڈ کرنے والے کی تلاش ہے ، اس سلسلے میں پولیس نے ایف آئی اے سائبر کرائم سے رابطہ کیا اور ملزمان سے برآمد ویڈیوز ایف آئی اے کو دے دیں۔
یاد رہے اسلام آباد پولیس نے جوڑے پر تشدد کیس کے ملزمان کے نام پاسپورٹ واچ لسٹ میں شامل کرنے کیلئے ایف آئی اے کو مراسلہ لکھا تھا ، جس میں کہا تھا کہ ملزمان کے بیرون ملک فرار ہونے کا خدشہ ہے نام پاسپورٹ واچ لسٹ میں کیے جائیں۔
لڑکی، لڑکے کو ہراساں کرنے کے کیس میں سنسنی خیز انکشافات سامنے آئے تھے ، جس میں متاثر لڑکی کو ویڈیوزکے ذریعے بلیک میل کر کے لاکھوں روپے بٹورنے کا انکشاف ہوا تھا ۔
ذرائع کا کہنا تھا کہ گینگ کے کارندے مختلف اوقات میں متاثرہ لڑکی سے الگ الگ بھتہ وصول کرتے رہے، گینگ نے متاثرہ لڑکی کو بلیک میل کرکے 13 لاکھ روپے وصول کیے۔
بعد ازاں وفاقی پولیس نے مقدمے میں بلیک میلنگ، بھتہ لینے کی دفعات شامل کرنے کا فیصلہ کرتے ہوئے اعلیٰ پولیس افسران کا مقدمے میں مزید دفعات شامل کرنے کیلئے وزارت قانون سے رابطے کی ہدایت کردی تھی۔
