اسلام آباد: پاکستان پیپلز پارٹی اور مسلم لیگ (ن) نے مشترکہ صدارتی امیدوار لانے کا فیصلہ کر لیا ہے، مشترکہ امیدوار کے اعلان کے لیے آل پارٹیز کانفرنس طلب کر لی گئی۔
تفصیلات کے مطابق پی پی اور ن لیگ نے مذاکرات کے بعد صدرِ پاکستان کے عہدے کے لیے مشترکہ امیدوار لانے کا فیصلہ کیا ہے تاہم اس سلسلے میں کس کو نامزد کیا جائے گا، اس کا تعین اے پی سی میں ہو گا۔
ذرائع کا کہنا ہے کہ آل پارٹیز کانفرنس 25 اگست کو مری میں منعقد ہو گی، کانفرنس کی میزبانی میاں شہباز شریف کریں گے۔
واضح رہے کہ مشترکہ صدارتی امیدوار لانے کے سلسلے میں اپوزیشن نے کوششیں تیز کر دی ہیں، لاہور میں پیپلزپارٹی اور ن لیگ کے وفد کے درمیان ایک اہم ملاقات بھی ہوئی۔
پیپلز پارٹی کے خورشید شاہ اور رضا ربانی نے ماڈل ٹاؤن میں شہباز شریف سے بھی ملاقات کی، دونوں جماعتوں کے رہنماؤں نے صدارتی انتخابات سے متعلق مشترکہ حکمت عملی پر تبادلۂ خیال کیا۔
مزید پڑھیں: متفقہ صدارتی امیدوار لانے کے لیے اپوزیشن نے کوششیں تیز کر دیں
خیال رہے کہ پیپلز پارٹی نے چوہدری اعتزاز احسن کو صدارتی امیدوار نامزد کیا تھا، مگر مسلم لیگ ن کو پیپلز پارٹی کے امیدوار پر شدید تحفظات ہیں۔