خیرپور: نائب صدر مسلم لیگ فنکشنل سندھ سید اسماعیل شاہ راشدی کا کہنا ہے کہ انتخابات میں دھاندلی کے ثبوت موجود ہیں، سازش کے تحت جی ڈی اے کے امیدواروں کو ہرایا گیا ہے۔
تفصیلات کے مطابق خیرپورمیں اپنی رہائش گاہ پرکارکنوں سے خطاب کرتے ہوئے نائب صدر مسلم لیگ فنکشنل سندھ سید اسماعیل شاہ راشدی نے کہا کہ الیکشن میں جی ڈی اے امیدواروں کو سندہ بھر سے ایک سازش کے تحت شکست دی گئی۔
سید اسماعیل شاہ راشدی کا کہنا تھا کہ الیکشن پر21 ارب روپے خرچ ہوئے پر افسوس کہ آر ٹی سی سسٹم بھی فیل ہوگیا جس کا مطلب نتائج من پسند ہی دینے تھے۔
نائب صدرمسلم لیگ فنکشنل سندھ کا یہ بھی کہنا تھا کہ سندہ میں ایک کرپٹ تنظیم کو تیسری باری دی گئی ہے جس کا مطلب سندہ کو مزید پیچھے دھکیلنا ہے۔
اسماعیل شاہ راشدی کا کہنا تھا کہ ہمارے ایجنٹوں کو پولنگ ختم ہونے کے بعد باہر نکالا گیا جبکہ ہمیں فارم 45 بھی نہیں دیا گیا۔
انہوں نے مزید کہا کہ پی ایس 31 پر مخالف امیدوار کی ملی بھگت سے من پسند پرزائیڈنگ افسر تعینات کیے گئے جن پر ہم نے الیکشن سے قبل ہی الیکشن کمیشن کو آن رکارڈ شکایات کی پرکوئی ایکشن نہیں لیا گیا۔
نائب صدرمسلم لیگ فنکشنل سندھ کا کہنا تھا کہ الیکشن میں دھاندلی کے تمام ثبوت عدالت میں پیش کریں گے۔ اسماعیل شاہ نے مطالبہ کیا کہ سندہ میں دوبارہ الیکشن کرائے جائیں دیگر صورت شدید احتجاج کیا جائے گا۔
یاد رہے کہ تین روز قبل سربراہ جی ڈی اے نے انتخابات میں دھاندلی کے خلاف عدالت جانے کا اعلان کرتے ہوئے کہا تھا کہ الیکشن میں دھاندلی کے خلاف عدالت سے رجوع کریں گے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
