یروشلم : اسرائیلی فوج نے الزام عائد کیا ہے کہ حزب اللہ نے اسرائیلی سرحد پر حملوں میں اضافہ کردیا ہے، جس کا حکم اسے ایرانی حکومت نے دیا۔
غیرملکی خبر رساں ادارے ادارے کی رپورٹ کے مطابق ترجمان اسرائیلی فوج کا کہنا ہے کہ اتوار کو لبنان اسرائیل سرحد پر ہونے والے حملے حزب اللہ نے ایران کی ایما پر کیے۔
اسرائیل کے چیف ملٹری ترجمان ریئر ایڈمرل ڈینیئل ہگاری نے ایک بریفنگ میں کہا کہ حزب اللہ نے جنوبی غزہ میں ہماری جنگی کوششوں سے توجہ ہٹانے کے لیے ایرانی ہدایات پر اور اس کی مکمل حمایت سے حملے کیے ہیں۔”
صہیونی فوج کے ترجمان نے بتایا کہ حزب اللہ غزہ میں اسرائیل کی جوابی کارروائی میں خلل ڈالنا چاہتی ہے، ضرورت پڑی تو اسرائیلی فوج 2یا اس سے زائد محاذ پر بھی لڑائی کیلئے تیار ہے۔
یاد رہے کہ غزہ پر اسرائیلی فضائیہ کی بمباری میں ہلاک ہونے والوں کی تعداد 2700 سے بڑھ گئی ہے جبکہ اسرائیل کا کہنا ہے کہ حماس کے حملوں میں اس کے 1400 سے زیادہ شہری ہلاک ہوئے جبکہ 199 یرغمال بنائے گئے ہیں۔
علاوہ ازیں اسرائیل کے زمینی حملے کے پیش نظر اب تک تقریباً 10 لاکھ فلسطینی شمالی غزہ سے جنوب کی جانب نقل مکانی کرچُکے ہیں۔
