غزہ: قابض اسرائیلی فوج کے فلسطین میں مظالم جاری ہیں، درجنوں نہتے اور معصوم فلسطینیوں کو گرفتار کرلیا گیا۔
تفصیلات کے مطابق مقبوضہ بیت المقدس اور غرب اردن میں اسرائیلی فوج کے گھر گھر چھاپے کے دوران 22 فلسطینیوں کو حراست میں لے لیا۔
غیر ملکی خبر رساں ادارے کے مطابق قابض صہیونی فوج کے الزام عائد کیا ہے کہ محروسین میں بعض اسرائیلی سیکیورٹی اداروں کو مطلوب تھے، حراست میں لئے گئے تمام فلسطینیوں کو تفتیش کے لیے حراستی مراکز اور عقوبت خانوں میں ڈال دیا گیا ہے۔
قابض فوج نے پیر کو غرب اردن کے جنوبی شہروں الخلیل اور بیت لحم میں گھر گھر تلاشی کے دوران متعدد فلسطینیوں کو حراست میں لے لیا۔
الخلیل میں بیت امر کے مقام پر چھاپے کے دوران 25 سالہ یوسف احمد حمدان، 22 سالہ محمد حسین جعفر عادی اور 17 سالہ احمد کریم محمد اخلیل کی گرفتاری عمل میں لائی گئی۔
فلسطینی سماجی کارکن محمد عوض نے بتایا کہ اسرائیلی فوج نے فلسطینیوں کے گھروں پر اشتعال انگیز انداز میں چھاپے مارے، الخلیل میں تلاشی کے دوران قابض فوج نے ابو اسنینہ خاندان کے گھر میںتلاشی لی، تلاشی کے دوران قیمتی سامان کی توڑپھوڑ اور لوٹ مار کی گئی۔
اسرائیل کی جارحیت، غزہ میں فضائی بمباری شروع
ادھر جنوبی شہر بیت لحم میں تلاشی کے دوران 7 فلسطینیوں کو حراست میں لیا گیا۔ قابض فوج نے غرب اردن کے شمالی شہر جنین میں شاہراہ الناصرہ پر فلسطینیوں کی تلاشی کے دوران متعدد شہریوںکو حراست میں لیا۔ اس موقع پر اسرائیلی فوج نے دعویٰ کیا کہ پٹرولیم پولیس پر فلسطینیوںکی طرف سے دیسی ساختہ دسی بم پھینکے گئے۔
