بیروت : جنوبی لبنان میں 8 اسرائیلی فوجیوں کی ہلاکت کے بعد حالات مزید کشیدہ ہوگئے، اسرائیلی فوج نے بیروت میں بمباری کرکے کئی عمارتوں کو تباہ کردیا جس کے نتیجے میں 6 افراد کی شہادت کی اطلاعات ہیں۔
الجزیرہ کی رپورٹ کے مطابق لبنانی دارالحکومت بیروت ایک بار پھر زوردار دھماکوں سے گونج اٹھا۔ رات گئے بیروت کے جنوبی علاقے دحیہ میں تین زوردار دھماکوں کی آوازیں سنی گئی ہیں۔
اسرائیلی فوج اور حزب اللہ کے درمیان جنوبی لبنان میں شدید لڑائی تاحال جاری ہے، جبکہ رات بھر وسطی بیروت پر اسرائیلی فضائی حملوں میں کم از کم چھ افراد ہلاک اور آٹھ زخمی ہوئے ہیں۔
بیروت میں دھماکوں کے بعد عمارتوں سے دھواں اٹھتا دکھائی دے رہا ہے، جس کے فوری بعد اسرائیلی فوجی حکام نے حملوں کی تصدیق کرتے ہوئے کہا ہے کہ دحیہ میں حزب اللہ کے ٹھکانوں کو نشانہ بنایا گیا ہے۔
دوسری جانب لبنان کی وزارت صحت کے مطابق گذشتہ 24 گھنٹوں کے دوران اسرائیلی حملوں میں لبنان بھر میں مزید 46 افراد ہلاک اور 85 زخمی ہوگئے ہیں۔
جنوبی لبنان میں حزب اللہ کے جنگجوؤں اور اسرائیلی فوج میں شدید لڑائی جاری ہے، جہاں اسرائیل نے تصدیق کی ہے کہ اب تک اس کے کم از کم آٹھ فوجی قریب سے ہونے والی لڑائی میں مارے گئے ہیں۔
علاوہ ازیں اسرائیل کی جانب سے غزہ پر بھی حملوں کا سلسلہ جاری ہے اس میں مزید شدت پیدا کی گئی ہے، متعدد فلسطینی پناہ گاہوں اور اسکولوں، بشمول ایک یتیم خانے پر حملے میں مارے گئے۔
یاد رہے کہ گزشتہ سال 7اکتوبر سے جاری اسرائیلی حملوں میں اب تک کم از کم 41,689 افراد ہلاک اور 96,625 زخمی ہو چکے ہیں۔ اس کے علاوہ اسرائیل میں 7 اکتوبر کو حماس کے حملوں میں کم از کم 1,139 افراد ہلاک اور 200 سے زائد افراد کو قیدی بنا لیا گیا تھا۔
