اسرائیلی فوج کی جانب سے غزہ میں فلسطینیوں پر ظلم و ستم کا سلسلہ تاحال جاری ہے، خان یونس کے ایک اسکول پر فضائی حملے میں کم از کم 25 فلسطینی جام شہادت نوش کرگئے۔
بین الاقوامی خبر رساں ادارے کی رپورٹ کے مطابق فلسطین کی وزارت صحت کا اس حوالے سے کہنا ہے کہ اسرائیلی فوج نے خان یونس کے جنوب میں واقع اباسان شہر کے العودہ اسکول پر بمباری کی۔
اسکول پر بمباری کے نتیجے میں بڑی تعداد خواتین اور بچے شہید ہوگئے جبکہ حملے میں 53 سے زائد افراد زخمی بھی ہوئے ہیں۔
فلسطین کی وزارت صحت کے بیان میں کہا گیا ہے کہ حملے کے نتیجے میں زخمیوں میں متعدد افراد کی حالت تشویش ناک ہے جس کے باعث جاں بحق افراد کی تعداد بڑھ سکتی ہے۔
غزہ کے سرکاری میڈیا آفس کے مطابق اقوام متحدہ کے زیر انتظام چلنے والے اسکول میں بے گھر خاندان پناہ لئے ہوئے تھے۔
یوکرین میں شہری تنصیبات کو نشانہ نہیں بنایا، روس
دوسری جانب اسرائیلی حملے پر حماس نے خبردار کیا ہے کہ شہریوں پر حملوں سے جنگ بندی مذاکرات خطرے میں پڑ سکتے ہیں۔
