غزہ، لبنان اور شام میں اسرائیلی فورسز نے تازہ حملے کیے ہیں، الجزیرہ کی رپورٹس کے مطابق مشرق وسطیٰ میں اس وقت بھی صہیونی فوج آگ اور خون کی بارش برسا رہی ہے۔
تازہ ترین حملوں میں شام کے شہر حمص میں اسرائیلی میزائلوں نے ایک کار فیکٹری کو نشانہ بنایا، ملک کی سرکاری خبر رساں ویب سائٹ SANA کے مطابق شام کی حمص گورنری میں واقع ایک آٹوموٹو فیکٹری پر میزائل داغے گئے ہیں۔
سیریئن آبزرویٹری فار ہیومن رائٹس کے مطابق دو اسرائیلی میزائلوں نے صنعتی علاقے کو نشانہ بنایا، اس حوالے سے ایک مختصر ویڈیو سامنے آئی ہے جس میں علاقے سے دھوئیں کے بادل اٹھتے ہوئے دکھایا گیا ہے۔ اس حملے میں کم از کم ایک شخص ہلاک اور تین زخمی ہوئے ہیں۔
لبنان کے دارالحکومت بیروت کے جنوبی مضافات میں کچھ دیر قبل زبردست دھماکے ہوئے ہیں، جس نے شہر کو ہلا کر رکھ دیا، جس علاقے میں چند گھنٹے قبل زبردست فضائی حملہ کیا گیا یہ وہ وہی جگہ ہے جس کو جمعرات سے اسرائیلی جنگی طیارے نشانہ بنا رہے ہیں، یہ بین الاقوامی ایئرپورٹ سے متصل علاقہ ہے، تاہم ہوائی اڈہ ابھی بھی کام کر رہا ہے۔
حملے کے وقت پورا علاقہ لرز رہا تھا اور ایئرپورٹ کی طرف جانے والی سڑک کو بھی دو بار اسرائیلی جنگی طیاروں نے نشانہ بنایا، جنوبی مضافاتی علاقے میں کئی مقامات پر اسرائیلی ڈرون یا طیاروں سے حملہ کیا گیا اور اب بھی ہنگامی سروسز کو اس علاقے کے قریب جانے سے روکا جا رہا ہے۔
عراق میں ایران کی حمایت یافتہ عسکری تنظیم اسلامی مزاحمت نے مقبوضہ گولان کی پہاڑیوں میں اسرائیلی اہداف پر تین الگ الگ ڈرون حملے کیے ہیں، دو دن قبل بھی اس گروپ نے اس علاقے میں ایک اسرائیلی فوجی اڈے پر دو ڈرون حملے کیے تھے، جن میں سے ایک کو روک لیا گیا لیکن دوسرے نے اسرائیلی فوجیوں کو نشانہ بنایا، جس سے دو ہلاک اور 24 زخمی ہو گئے۔ اور یہ پہلا موقع تھا جب عراق سے داغے جانے والے میزائل نے اسرائیلی افواج کو جانی نقصان پہنچایا۔
القدس بریگیڈ نے بھی شمالی غزہ میں اسرائیلی فورسز پر حملوں کا دعویٰ کیا ہے۔ فلسطینی اسلامی جہاد کے مسلح ونگ کا کہنا ہے کہ اس کے جنگجوؤں نے شمالی غزہ کے بیت حنون قصبے کے مشرق میں گرلز اسٹریٹ پر ایک اسرائیلی فوجی کو ہلاک کر دیا ہے۔ ٹیلیگرام پر کہا گیا کہ یہ حملہ حماس کے مسلح ونگ ’قسام بریگیڈز‘ کے ساتھ مل کر کیا گیا۔
اسرائیل نے پیجر حملوں کا ’ٹروجن ہارس‘ 2015 ہی میں بھیج دیا تھا، واشنگٹن پوسٹ کا انکشاف
ایک اور بیان میں القدس بریگیڈز نے کہا کہ اس نے ٹی بی جی یا تھرموبارک راکٹوں سے شمالی غزہ میں جبالیہ کیمپ میں گھسنے والی اسرائیلی افواج سے تعلق رکھنے والے ایک ’کمانڈ اینڈ کنٹرول روم‘ کو بھی نشانہ بنایا۔
اسرائیلی فوج نے جنوبی لبنان کے دیہاتوں کے لیے ’فوری‘ انخلاء کا حکم جاری کر دیا ہے، اسرائیلی فوج نے جنوبی لبنان کے 25 دیہاتوں کے لوگوں کو فوری طور پر نکلنے کا حکم دیا، جس سے یہ اشارہ ملتا ہے کہ وہ اپنی زمینی کارروائی میں اضافہ کرنے جا رہا ہے۔
اسرائیل نے غزہ میں مزید فوجی بھیج دیے ہیں، اسرائیلی فوج نے اعلان کیا ہے کہ اس نے غزہ کی پٹی بشمول نیزارم کوریڈور اور علاقے کے سرحدی علاقوں میں مزید فوجی اور ہتھیار بھیجے ہیں۔
