تل ابیب: اسرائیل نے حماس کے اہم بانی اور 7 اکتوبر کو اسرائیل میں ہونے والے حملے کے ماسٹر مائنڈ کو مارنے کا دعویٰ کر دیا ہے۔
اسرائیلی فوج کا کہنا ہے کہ اس نے غزہ شہر میں لڑائی کے دوران حماس کے سینئر رہنما محمد عیسی العیسی کو شہید کر دیا ہے، جب کہ حماس نے اس پر کوئی تبصرہ نہیں کیا ہے۔
اسرائیل ڈیفنس فورسز (آئی ڈی ایف) نے ہفتے کے روز کہا کہ انھوں نے اسرائیل کی سیکیورٹی ایجنسی (ISA) کے ساتھ مشترکہ آپریشن میں حماس کے ایک بانی کو ’’ختم‘‘ کر دیا ہے۔
آئی ڈی ایف کے دعوے کے مطابق حماس کے عسکری ونگ کی سینئر شخصیت محمد عیسیٰ العیسیٰ کو جمعہ کو صابرہ میں ایک فضائی حملے میں نشانہ بنایا گیا۔
مشرق وسطیٰ جہنم میں تبدیل، اسرائیل کے 5 ممالک میں 35 ہزار حملے
محمد عیسیٰ حماس کے جنگی معاونت اور تربیتی کے ہیڈ کوارٹر کے سربراہ تھے، انھوں نے غزہ کی پٹی میں فورس بنانے کی کوششوں کی قیادت کی، وہ حماس کی جنرل سیکیورٹی کونسل کے رکن بھی تھے۔
اسرائیلی فوج کے مطابق محمد عیسیٰ نے سات اکتوبر کے حملوں کی نہ صرف منصوبہ بندی کی بلکہ اس پر عمل درآمد میں بھی اہم کردار ادا کیا تھا، گزشتہ چند دنوں میں انھوں نے غزہ کی پٹی میں سرگرم اسرائیلی شہریوں اور آئی ڈی ایف کے فوجیوں پر حملوں کی منصوبہ بندی میں بھی مدد کی۔
اسرائیل نے جنگ کے دوران حماس کے تنظیمی نظام کو نقصان پہنچا دیا تھا اور عیسیٰ اسے دوبارہ بنانے کی کوشش کر رہے تھے، آئی ڈی ایف نے کہا ہے کہ اس نے ہفتے کے روز جنوبی لبنان کے علاقے مہرونہ میں بھی حزب اللہ کی ایک اہم شخصیت عباس الحسن وہبی کو بھی مار دیا ہے۔
