غزہ میں اسرائیلی سفاکیت کی انتہا ہو گئی، اسرائیلی فضائیہ نے انخلا کے حکم کے چند منٹ بعد ہی مشرقی خان یونس پر گولہ باری کر دی۔
الجزیرہ کے مطابق صہیونی افواج نے فلسطینیوں کو خان یونس کے مشرقی علاقے سے انخلا کے احکامات جاری کرتے ہوئے اعلان کیا تھا کہ مشرقی غزہ خالی کر دیا جائے، یہاں بڑا آپریشن ہوگا۔
تاہم انخلا کے حکم کے چند ہی منٹ بعد اسرائیلی فوج نے فضائی حملے اور توپ خانے سے گولہ باری شروع کر دی، بمباری کے بعد نصر میڈیکل کمپلیکس پر 27 لاشیں اور درجنوں زخمی لائے گئے۔
غزہ میں فلسطینی شہری دفاع کا کہنا ہے کہ انخلا کے حکم سے 4 لاکھ سے زیادہ فلسطینی متاثر ہوئے ہیں، جنھیں کسمپرسی کی حالت میں ایک بار پھر نقل مکانی کرنی پڑی۔
غزہ میڈیا آفس کے مطابق اسرائیلی فورسز نے گزشتہ ایک ہفتے کے دوران صرف نصیرات پناہ گزین کیمپ پر 63 حملے کیے، جس کے نتیجے میں 91 فلسطینی شہید اور 251 زخمی ہوئے، جب کہ گزشتہ چوبیس گھنٹوں کے دوران متعدد علاقوں پر بمباری کے نتیجے میں 64 فلسطینی شہید اور 105 زخمی ہوئے۔
ایک طرف صہیونی فورسز کی بمباری اور غزہ میں قتل عام جاری ہے، دوسری طرف قیدیوں کے تبادلے کے لیے مذاکرات کے لیے بھی کوششیں ہو رہی ہیں، امریکی دورے پر موجود اسرائیلی وزیر اعظم نتین یاہو کا کہنا ہے کہ غزہ جنگ بندی معاہدے پر مذاکرات دوبارہ شروع کرنے کے لیے اسرائیلی وفد جمعرات کو دوحہ روانہ ہوگا۔
