دمشق: اسرائیل نے شام کے دارالحکومت دمشق پر میزائلوں کی بارش کر دی، شام کے وقت شہر دھماکوں سے گونج اٹھا۔
تفصیلات کے مطابق اسرائیل نے پیر کو دمشق پر متعدد میزائل داغے ہیں تاہم کسی بڑے نقصان کی اطلاع نہیں ملی، شامی دارالحکومت میں موجود اے ایف پی کے نمائندے کے مطابق شہر میں شام کے وقت دھماکوں کی آوازیں سنی گئیں۔
خبر ایجنسی نے شام کی سرکاری میڈیا صنعا کے حوالے سے بتایا کہ دمشق کے جنوب میں فضائی دفاع کے نظام نے اکثر اسرائیلی میزائل ناکام بنا دیے، میزائلوں سے صرف انفرا اسٹرکچر کو نقصان پہنچا۔
شامی فوج کے ذرائع کا کہنا ہے کہ دشمن اسرائیل نے مقبوضہ گولان کی پہاڑی اور دمشق کے جنوب میں بعض علاقوں کو میزائلوں سے نشانہ بنایا، تاہم ان میں سے زیادہ تر میزائل فضا ہی میں تباہ کر دیے گئے۔
خیال رہے کہ گزشتہ ماہ زمین سے زمین تک مار کرنے والے اسرائیلی میزائلوں کے حملے میں دمشق کے قریب شام کے تین فوجی مارے گئے تھے، ان حملوں میں میں دمشق کے قریب ایرانی ٹھکانوں اور ہتھیاروں کے ڈپو کو نشانہ بنایا گیا تھا۔
