تہران: ایران کو جوہری طاقت بننے سے روکنے کے لیے امریکا اور اسرائیل کے درمیان معاہدہ ہو گیا۔
تفصیلات کے مطابق ایران نے جوہری طاقت بننے سے روکنے کے لیے امریکا اور اسرائیل کے درمیان ہونے والے معاہدے پر سخت ردِ عمل ظاہر کیا ہے۔
ایرانی صدر ابراہیم رئیسی نے کہا کہ اگر واشنگٹن یا اس کے اتحادیوں نے ایران کے خلاف جارحیت کی تو اس کا سختی سے جواب دیں گے۔
انھوں نے کہا ہم مریکا کو واضح کر چکے ہیں کہ ایران کی علاقائی سالمیت کے خلاف اقدام کو برداشت نہیں کریں گے، انھوں نے مزید کہا امریکی صدر جو بائیڈن کے مشرق وسطیٰ کے دورے اسرائیلی حکومت کی سلامتی کو یقینی نہیں بنا سکتے۔
ایرانی صدر ابراہیم رئیسی نے کہا کہ ایران کی علاقائی سالمیت کے خلاف سب سے چھوٹا اقدام بھی ہمارے فیصلہ کن ردِ عمل کا باعث بنے گا۔
واضح رہے کہ سعودی عرب اور خلیجی ممالک کو تیل کی پیداوار بڑھانے پر آمادہ کرنے، سعودی عرب اور اسرائیل کے درمیان تعلقات استوار کروانے اور خلیجی ممالک اور اسرائیل کے درمیان مجوزہ مشترکہ دفاع تعاون کو آگے بڑھانے جیسے اہم امور امریکی صدر کے ایجنڈے کا حصہ ہیں۔
جو بائیڈن اسرائیل کے دورے کے دوران 2 دن بیت المقدس (یروشلم) میں قیام کر رہے ہیں، جہاں وہ اسرائیلی حکام کے علاوہ غرب اردن میں فلسطینی اتھارٹی کے رہنما محمود عباس سے بھی آج جمعہ کے روز ملاقات کریں گے۔
