اسرائیل نے ایران کے مہرآباد ایئرپورٹ کے قریب فضائی حملے کئے ہیں، حملوں کے باعث ہوائی اڈے کو نقصان پہنچنے کی اطلاعات موصول ہوئی ہیں۔
غیر ملکی ذرائع ابلاغ کے مطابق اسرائیل کی جانب سے مہر آباد ایئرپورٹ کے قریب کئے گئے فضائی حملے کے بعد متاثرہ علاقے سے دھوا اُٹھتا ہوا دیکھا گیا۔ وسطی تہران میں بھی دھماکوں کی آوازیں سنی گئیں۔
جبکہ ایران کی جانب سے اسرائیل پر پانچواں میزائل حملہ کیا گیا ہے، چوتھے حملے میں میزائل اسرائیلی دارالحکومت تل ابیب کے عین وسط میں گرا تھا، جس میں اسرائیلی جوہری تحقیق مرکز کو نشانہ بنانے کا دعویٰ کیا جارہا ہے۔
تل ابیب اور مقبوضہ بیت المقدس میں سائرن کی آوازیں گونج رہی ہیں، اسرائیلی فوج کا کہنا ہے کہ ایران کی جانب سے فائر کئے گئے میزائلوں کو روکنے کے لیے دفاعی نظام کو متحرک کردیا گیا ہے۔
دوسری جانب اسرائیل پر کیے جانے والے حالیہ میزائل حملے کے بعد ایرانی حکام نے دھمکی دی ہے کہ اگر کسی ملک نے اسرائیل کا دفاع یا اس کی حمایت کی تو اس پر اس سے بڑا حملہ کیا جائے گا۔
ایرانی حکام کا کہنا ہے کہ اسرائیل پر اپنے حملوں میں تیزی لائیں گے، ایرانی حکام نے دھمکی دی کہ جو ملک اسرائیل کے دفاع میں آگے آئے گا اس کی اہم تنصیبات کو بھی نشانہ بنایا جائے گا۔
ایرانی حکام کے ایک پیغام کے مطابق ایران عالمی قوانین کے تحت اپنی سلامتی اور دفاع کیلیے فیصلہ کن جواب دینے کا مکمل حق رکھتا ہے۔
یاد رہے کہ ایران نے دعویٰ کیا ہے کہ ایرانی ایئر ڈیفنس سسٹم نے 2 اسرائیلی طیارے مار گرائے ہیں۔
الجزیرہ کی رپورٹ کے مطابق اسرائیل نے ایرانی ایئر ڈیفنس سسٹم کی جانب سے 2 طیارے مار گرانے اور خاتون پائلٹ کے گرفتار ہونے کی تردید کردی ہے۔
اسرائیل پر جلد خیبر میزائل سے حملہ کیا جائے گا، ایران کا واضح پیغام
رائٹرز کی رپورٹ کے مطابق ایرانی سینئر اہلکار نے کہا ہے کہ اسرائیل میں کوئی مقام بھی محفوظ نہیں رہے گا ہمارا بدلہ تکلیف دہ ہوگا۔
