واشنگٹن : ترجمان امریکی محکمہ خارجہ میتھیو ملر کا کہنا ہے کہ اسرائیل پر واضح کردیا ہے کہ لبنان میں عام شہریوں کو نشانہ نہ بنائے۔
واشنگٹن میں مشرق وسطیٰ میں جاری کشیدگی پر پریس بریفنگ دیتے ہوئے انہوں نے کہا کہ امریکا لبنان میں عام شہریوں، انفرا اسٹرکچر کو نشانہ بنتے نہیں دیکھنا چاہتا۔
ان کا کہنا تھا کہ مشرق وسطیٰ کی صورتحال پر امریکا کی گہری نظر ہے، مشرق وسطیٰ میں قیام امن کیلئے کوششیں کررہے ہیں۔
میتھیو ملر نے کہا کہ حماس نے جنگ بندی سے متعلق مذاکرات میں شامل ہونے سے انکار کردیا ہے، مشرق وسطیٰ کی صورتحال سے بخوبی آگاہ ہیں، امن کیلئے مسلسل کوششیں کررہےہیں۔
اس موقع پر امریکی ترجمان سے سوال کیا گیا کہ ’’بلاول بھٹو نے شہباز شریف پر سیلاب متاثرین کی رقم کھانے کا الزام عائد کیا ہے ‘‘ ترجمان امریکی محکمہ خارجہ سے یہ بھی پوچھا گیا کہ کیا امریکا امداد کیلئے دی جانے والی رقم کے غلط استعمال پرنظر رکھتا ہے؟
جس کے جواب میں میتھیو ملر نے بتایا کہ امریکا ایسی اطلاعات کو سنجیدگی سے لیتا ہے، دنیا میں جہاں بھی امریکی ٹیکس دہندگان کے ڈالراستعمال ہوتے ہیں سنجیدہ معاملہ ہے۔
ان کا مزید کہنا تھا کہ یو ایس ایڈ کے ذریعے امداد کی فراہمی کی نگرانی کا ایک سخت نظام استعمال کیا جاتا ہے، غلط استعمال ہو تو امریکا امداد بند کردیتا ہے۔
