غزہ میں اسرائیل کی جانب سے خون کی ہولی کھیلنے کا سلسلہ جاری ہے، تازہ حملوں میں 6 سگے بھائیوں سمیت مزید 37 فلسطینی شہید ہوگئے۔
بین الاقوامی خبر رساں ادارے کی رپورٹ کے مطابق گزشتہ روز غزہ کے علاقے دیر البلح میں بھوکے فلسطینیوں کو خوراک فراہم کرنے میں مصروف 6 سگے بھائی، جن کی عمریں 10 سے 34 سال کے درمیان تھیں اسرائیلی بمباری کے نتیجے میں جام شہادت نوش کرگئے۔
رپورٹس کے مطابق شہید بیٹوں کے والد زکی ابو مہدی نے کہا ہے کہ ان کے بیٹے جنگ کے آغاز سے ہی ضرورت مندوں کی مدد کر رہے تھے اور ان کے پاس کوئی ہتھیار نہیں تھا۔
اس کے علاوہ عالمی ادارہ صحت کا کہنا ہے کہ ایک فلسطینی بچہ طبی امداد کی فراہمی میں خلل کے باعث شہید ہوگیا۔
عرب میڈیا کے مطابق اتوار کے روز غزہ کی پٹی کے مختلف علاقوں میں ہونے والے اسرائیلی بمباری میں کم از کم 37 فلسطینی شہید ہوئے۔
دوسری جانب سعودی عرب نے غزہ کے الأہلی اسپتال پر اسرائیل کے وحشیانہ حملے کی سخت مذمت کی ہے۔
تفصیلات کے مطابق سعودی وزارت خارجہ نے کہا ہے کہ اسرائیل کا غزہ کے اسپتال الاھلی پر حملہ گھناؤنا جرم ہے، اسپتال پر حملہ جنگی جرائم کے زمرے میں آتا ہے۔
ادھر عالمی ادارہ صحت (ڈبلیو ایچ او) نے اطلاع دی ہے کہ غزہ الأہلی اسپتال پر حملے میں بچہ علاج نہ ہونے کے باعث دم توڑ گیا، اسپتالوں پر اسرائیل کے حملے بچوں کی موت کا سبب بن رہے ہیں۔
ڈبلیو ایچ او نے بیان میں کہا کہ الاھلی اسپتال پر حملے کے بعد 50 مریضوں کو دوسرے اسپتالوں میں منتقل کیا گیا، اس حملے میں ایمرجنسی روم، لیبارٹری اور ایکسرے مشینیں تباہ ہو گئیں، عالمی قوانین کے مطابق اسپتالوں کو نشانہ بنانا سنگین جرم ہے۔
امریکا کا یمن پر فضائی حملہ، 5 شہید
عرب میڈیا کے مطابق ایرانی وزیر خارجہ عباس عراقچی نے مصری وزیر خارجہ کو ٹیلیفون کر کے غزہ میں جاری اسرائیلی حملوں پر گفتگو کی، رہنماؤں نے جنگ بندی کے لیے سفارتی کوششیں تیز کرنے پر اتفاق کیا۔
