غزہ میں اسرائیلی فوج کی جانب سے شدید بمباری کا سلسلہ جاری ہے، جس کے نتیجے میں 200 فلسطینی شہید ہوگئے۔
بین الاقوامی خبر رساں ادارے کی رپورٹ کے مطابق شہداء کی مجموعی تعداد 18 ہزار 200 ہوگئی ہے جبکہ 50 ہزار سے زائد زخمی ہیں، جنہیں طبی سہولیات بھی میسر نہیں۔
رپورٹس میں بتایا گیا ہے کہ اسرائیلی فوج نے غزہ سے درجنوں افراد کو اغواء بھی کرلیا ہے۔
ترجمان القسام بریگیڈ کے مطابق انہوں نے تل ابیب پر میزائلوں سے حملہ کیا ہے۔ جبکہ خان یونس کے شمالی محاذ پر دو اسرائیلی ٹینکوں کو راکٹوں سے نشانہ بنایا گیا، جس کی وڈیو بھی جاری کردی گئی ہے۔
دوسری جانب قطر میں دوحہ فورم سے ویڈیو کانفرنس کے ذریعے خطاب کرتے ہوئے ایران کے وزیر خارجہ حسین امیرعبداللہیان نے کہا کہ لوگ 7 اکتوبر کے حملے کو غزہ پر جنگ کا نقطہ آغاز نہ سمجھیں۔
امیرعبداللہیان نے اس بات پر زور دیا کہ اگرچہ ایران کو حملے سے پہلے اس بارے میں علم نہیں تھا حماس اسرائیلی قبضے کے خلاف آزادی کی تحریک جاری رکھے ہوئے ہے۔
نیتن یاہو نے خفیہ ٹیم تشکیل دے دی
انہوں نے کہا کہ یہ واضح ہے کہ یہ لڑائی پہلے ہی لبنانی محاذ اور یمنی محاذ تک پھیل چکی ہے، اور یقیناً یہ ہمارے پراکسی گروپ نہیں ہیں، نہ اسرائیل اور نہ ہی امریکہ حماس کو ختم کر سکتے ہیں چاہے وہ غزہ میں 10 سال بھی خرچ کر لیں۔
