اسرائیلی وزیراعظم نیتن یاہو نے ایرانی عوام کے نام پیغام دے دیا۔

اسرائیلی وزیراعظم نیتن یاہو نے پیغام میں کہا کہ ہمارا ہدف ایرانی عوام نہیں بلکہ ان کا جابرانہ نظام ہے، تاریخ کی بڑی فوجی کارروائی ’آپریشن رائزنگ لائن‘ میں مصروف ہیں۔

نیتن یاہو کا کہنا ہے کہ اسلامی حکومت 50 سال سے ایرانی عوام کو ظلم کا نشانہ بنا رہی ہے، یہ حکومت اسرائیل کی تباہی کی دھمکیاں دے رہی ہے ہم اپنا دفاع کریں گے۔

اسرائیلی وزیراعظم کا کہنا ہے کہ ہماری جنگ عوام سے نہیں، دہشتگردی اور جبر سے ہے، مشرق وسطیٰ کا مستقبل امن اور خوشحالی کا ہونا چاہیے۔

یہ پڑھیں: ایران نے اسرائیل پر جوابی حملہ کردیا

انہوں نے کہا کہ امید کرتے ہیں مشرق وسطیٰ میں امن و خوشحالی کا دن جلد آئے گا۔

عرب میڈیا نے اسرائیلی اخبار  ہارٹز  کا  حوالہ دیتے ہوئے دعویٰ کیا کہ  اسرائیل پر  ایران کے تازہ  حملوں میں  15 افراد  زخمی ہوئے ہیں، رپورٹ میں بتایا گیا کہ تمام  15 افراد وسطی اسرائیل میں زخمی ہوئے ہیں۔

رپورٹس کے مطابق ایران کے 100 سے زائد بیلسٹک میزائل حملوں میں تل ابیب میں عمارتوں کو بھی شدید نقصان پہنچا۔