نابلس: اسرائیلی فوجیوں نے نابلس میں ایک کار پر اندھا دھند فائرنگ کرکے 3 فلسطینیوں کو شہید کر دیا۔
تفصیلات کے مطابق فلسطینی وزارت صحت نے منگل کے روز ایک بیان میں کہا ہے کہ اسرائیلی سیکیورٹی فورسز نے مقبوضہ مغربی کنارے کے شہر نابلس میں تین فلسطینیوں کو گولیاں مار کر شہید کر دیا ہے، واقعے پر فلسطینی اتھارٹی کی جانب سے شدید مذمت کی گئی ہے۔
فلسطینی خبر رساں ایجنسی وفا کے مطابق مقتولین کی شناخت اشرف مبسلات، ادھم مبروکہ اور محمد دخیل کے نام سے ہوئی ہے۔
وفا نے عینی شاہدین کے حوالے سے بتایا کہ اسرائیلی فوجیوں نے شمالی شہر میں کار پر فائرنگ کی، ایجنسی کی طرف سے شیئر کی گئی فوٹیج کے مطابق کار گولیوں سے چھلنی تھی۔
عینی شاہدین کا کہنا تھا کہ متعدد اسرائیلی اسپیشل فورسز اہل کاروں نے شہر کے المخفیہ علاقے کی طرف جانے والی ایک کار میں سوار شہریوں پر اچانک اندھا دھند گولیاں برسانا شروع کیا۔
Watch: Footage shows Israeli soldiers getting out of a public taxi they used to raid Nablus and open fire at a vehicle, killing three #Palestinians.#FreePalestine pic.twitter.com/htiBZ4TYCN
— Wafa News Agency – English (@WAFANewsEnglish) February 8, 2022
فلسطینی اتھارٹی کی وزارت خارجہ نے ان ہلاکتوں کی بین الاقوامی تحقیقات کا مطالبہ کر دیا ہے جب کہ فلسطینی اتھارٹی کابینہ نے اسے "گھناؤنا جرم” قرار دے دیا ہے۔
وزارت خارجہ نے اسرائیلی حکومت اور وزیر اعظم نیفتالی بینیٹ کو مکمل طور پر اور براہ راست اس جرم کا ذمہ دار ٹھہرایا۔
بیان میں کہا گیا کہ اسرائیلی ظلم اور جرائم پر عالمی برادری کی خاموشی ان مجرمانہ کارروائیوں پر پردہ ڈال رہی ہے، اور اسرائیلی قابض فورسز کو فلسطینیوں کے خلاف اپنی کھلی جنگ جاری رکھنے کی ترغیب دے رہی ہے۔