اسلام آباد: ایف آئی اے نے اسلام آباد ایئرپورٹ پر کارروائی کے دوران جعلی افغان شہریت پر اٹلی کا رہائشی ویزہ حاصل کرنے والا ملزم گرفتار کرلیا۔
تفصیلات کے مطابق اسلام آباد ایئرپورٹ پر ایف آئی اے ایمیگریشن نے کارروائی کرتے ہوئے جعلی افغان شہریت پر اٹلی کا رہائشی ویزہ حاصل کرنے والا ملزم گرفتار کرلیا۔
محمد اسرارخٹک پرواز ای کے 612 پر دبئی سے اسلام آباد پہنچا تھا، دوران امیگریشن مسافر کا افغان پاسپورٹ جعلی پایا گیا، تلاشی کے دوران مسافر کے سامان سے پاکستانی شناختی کارڈ برآمد ہوا۔
ایف آئی اے حکام نے بتایا کہ اسرار خٹک نے جعلی افغانی دستاویز پر اٹلی میں سیاسی پناہ لے رکھی تھی، ملزم اٹلی کی حکومت کو چکمہ دے کر پاکستان پہنچ گیا تھا، ملزم کو گرفتار کرکے انسداد انسانی اسمگلنگ سیل منتقل کر دیا گیا۔
اسلام آباد ایئرپورٹ پر ایف آئی اے کی کارروائی، مطلوب ملزم گرفتار
یاد رہے کہ گزشتہ روز ایف آئی اے نے اسلام آباد ایئرپورٹ پر کارروائی کے دوران سی ٹی ڈی اور ایف آئی اے کو مطلوب خطرناک ملزم کو گرفتار کیا تھا۔
ایف آئی اے کے مطابق ظفر اقبال پرواز ٹی کے 710 سے استنبول سے اسلام آباد پہنچا تھا، دوران ایمیگریشن ملزم ظفر اقبال کو نام بلیک لسٹ میں ہونے پر گرفتار کیا گیا۔
