رمضان المبارک کے آخری عشرے کا آغاز ہوتے ہی مسجد نبویؐ میں اعتکاف کرنے والے بڑی تعداد میں پہنچ گئے۔ معتکفین کے لیے مختلف مقامات مخصوص کیے گئے ہیں۔
سعودی خبر رساں ادارے کی رپورٹ کے مطابق ادارہ امورحرمین کی جانب سے آخری عشرے میں اعتکاف میں بیٹھنے والے وہ مرد و خواتین جنہوں نے پہلے ہی پرمٹ حاصل کیے ہیں انہیں لاکرز بھی الاٹ کردیئے گئے ہیں جہاں اُن کی اشیاء محفوظ رہیں گی۔
مسجد نبویؐ میں اعتکاف کے دوران بیماری کی صورت میں فوری طبی امداد فراہم کرنے کی غرض سے مکمل سہولیات سے آراستہ کلینک بھی قائم کیا گیا ہے تاکہ معتکیفین کو کوئی مشکل پیش نہ آئے۔
انتظامیہ کی جانب سے اعتکاف کرنے والوں کی سہولت کے لیے افطاری اور سحری کا بندوبست بھی کیا گیا ہے اس کے علاوہ مختلف زبانوں میں دینی امور میں رہنمائی کے لیے اسکالرز کے لیکچرز کا بھی انتظام ہے۔
واضح رہے کہ ماہِ صیام کا تیسرا اورآخری عشرہ شروع ہوتے ہی مسجد الحرام اور مسجد نبوی صلی اللہ علیہ وآلہ وسلم میں لاکھوں کی تعداد میں زائرین پہنچ چکے ہیں۔
لاکھوں زائرین حرمین شریفین میں عبادات میں مشغول ہیں، شبِ قدر کی تلاش میں عبادت گزاروں میں جوش و خروش، مدینہ منورہ میں خصوصی خیمہ بستی آباد ہو گئی۔
ویڈیو: ابر رحمت برسنے کے دوران طواف خانہ کعبہ کے روح پرور مناظر
ماہِ صیام کا تیسرا اور آخری عشرہ شروع ہوتے ہی مکہ مکرمہ مسجد الحرام اور مدینہ منورہ میں دس ہزار افراد اعتکاف میں بیٹھ چکے ہیں۔ رواں برس دس ہزار افراد نے مسجد الحرام اور مسجدِ نبوی صلی اللہ علیہ وآلہ وسلم میں اعتکاف کے لیے رجسٹریشن کرائی۔
سعودی حکومت نے اعتکاف کے لیے وسیع انتظامات کیے ہیں، عام افراد کا اعتکاف کے ایریا میں داخلہ ممنوعہ ہے۔
