مسجد الحرام میں اعتکاف کے لیے حرمین شریفین امور کی جنرل اتھارٹی کی جانب سے رجسٹریشن کا اعلان کیا گیا ہے۔
بین الاقوامی خبر رساں ادارے کی رپورٹ کے مطابق جنرل اتھارٹی کا کہنا ہے کہ رجسٹریشن کا آغاز 17 مارچ 2024 (7 رمضان 1445ھ) سے اتھارٹی کے پورٹل اور ویب سائٹ کے ذریعے کیا جائے گا۔
مسجد الحرام میں اعتکاف کے متمنی افراد کے لئے چند شرائط بھی رکھی گئی ہیں، جن کے مطابق معتکف کی عمر 18 سے کم نہیں ہونی چاہئے اور 20 رمضان کو مقررہ وقت پر مسجد الحرام میں اعتکاف کیلیے پہنچنا شامل ہے۔
اتھارٹی کی جانب سے واضح پیغام دیا گیا ہے کہ مسجد الحرام میں اعتکاف کے خواہش مند فوری طور پر رجسٹریشن کرائیں کیونکہ تعداد مکمل ہونے پر رجسٹریشن روک دی جائے گی۔
یاد رہے مسجد الحرام اور مسجد نبوی صلی اللہ علیہ وآلہ وسلم انتظامیہ ہر سال اعتکاف کیلیے رجسٹریشن کا آغاز اور اس کے لیے مختص مقامات کا اعلان کرتی ہے۔
دوسری جانب سعودی حکومت کی جانب سے ماہ رمضان کے دوران مسجد الحرام اور مسجد نبویؐ آنے والے زائرین کو ماسک پہننے کی ہدایت کی گئی ہے۔
رمضان المبارک کے دوران سعودی عرب اور دیگر ممالک سے بڑی تعداد میں مسلمان عمرہ کرنے اور نماز ادا کرنے کے لیے مسجد الحرام اور مسجد نبویؐ کا رُخ کرتے ہیں، جس کے باعث حکام کی جانب سے انہیں ماسک پہننے کا مشورہ دیا گیا ہے۔
سماجی رابطے کی ویب سائٹ ایکس پر سعودی عرب کے پبلک سیکیورٹی ڈائریکٹوریٹ کا اپنے پیغام میں کہنا تھا کہ مسجد الحرام اور مسجد نبویؐ میں ماسک پہننے سے متعدد بیماریوں سے تحفظ حاصل ہوگا۔
مسجد الحرام، مسجد نبویؐ میں نماز تراویح کا روح پرور اجتماع
غیر ملکی میڈیا کے مطابق رمضان المبارک کے دوران عمرہ زائرین کے لیے مسجد کا صحن اور خانہ کعبہ کی رہائش کو مختص کردیا گیا ہے، اسی طرح حکام نے زائرین کے داخلے اور باہر نکلنے کے لیے وسیع و عریض مساجد کے کچھ دروازوں کو بھی مختص کیا ہے۔
