اے آر وائی ڈیجیٹل کے نئے ڈرامہ سیریل ’جانِ جہاں‘ کی پہلی قسط نشر کرنے کی تاریخ کا اعلان کردیا گیا ہے۔
ڈرامہ سیریل ’جانِ جہاں‘ میں اداکار حمزہ علی عباسی اور عائزہ خان مرکزی کردار نبھائیں گے، دیگر کاسٹ میں سویرا ندیم، نوال سعید ودیگر شامل ہیں۔
جانِ جہاں کی ہدایت کاری کے فرائض قاسم علی مرید نے انجام دیے ہیں جبکہ اس کی کہانی ردا بلال نے لکھی ہے۔
تاہم اب مداحوں کا انتظار ختم ہوگیا ہے کیونکہ ’جانِ جہاں‘ کی پہلی قسط نشر کرنے کی تاریخ کا اعلان کردیا گیا ہے۔
ڈرامہ سیریل ’جانِ جہاں‘ کی پہلی قسط 22 دسمبر بروز جمعہ کو نشر کی جائے گی اور ناظرین ہر جمعے اور ہفتے کی رات 8 بجے ڈرامہ دیکھ سکیں گے۔
اس سے قبل ڈرامہ سیریل ’جانِ جہاں‘ کا او ایس ٹی ’تیرا عشق جو طاری ہوا‘ ریلیز کیا گیا تھا جس میں معروف گلوکار راحت فتح علی خان نے اپنی آواز کا جادو جگایا ہے۔
حمزہ علی عباسی پہلی جھلک میں شعر پڑھتے ہیں جس کے بول کچھ یوں ہیں، ’تجھے اشکوں میں چھپایا ہے اب تک، تجھے پلکوں پر بٹھانا باقی ہے، کسی آیت کی طرح اے جان جہاں تجھے آنکھوں سے لگانا باقی ہے۔‘
عائزہ خان پہلی جھلک میں کہتی ہیں کہ ’میری جان ہے تجھ سے، میرا جہاں بھی ہے تجھ سے، میرا خود سے تم ہوکر فنا ہوجانا ابھی باقی ہے۔‘
واضح رہے کہ حمزہ علی عباسی اور عائزہ خان نے 2013 میں اے آر وائی ڈیجیٹل کے بلاک بسٹر ڈرامہ سیریل ’پیارے افضل‘ میں اداکاری کے جوہر دکھائے تھے۔
