معروف بالی ووڈ اداکارہ جیکولین فرنینڈس کا کہنا ہے کہ سکیش چندرا شیکھر کی جانب سے انہیں دھوکا دیا گیا اور تحائف سے متعلق لاعلم رکھا گیا۔
بھارتی میڈیا کے مطابق انفورسمنٹ ڈائریکٹوریٹ آف انڈیا نے سکیش چندرا شیکھر کے خلاف 200 کروڑ بھارتی روپے کی منی لانڈرنگ کے کیس میں اداکارہ جیکولین فرنینڈس کو بھی نامزد کیا تھا۔
چارج شیٹ کے مطابق چندرا شیکھر نے اپنی قریبی ساتھی پنکی ایرانی کے ذریعے جیکولین فرنینڈس کو 5 کروڑ 71 لاکھ بھارتی روپے کے تحائف پیش کیے تھے۔
ڈائریکٹوریٹ کی جانب سے جاری کردہ نوٹس کا جواب دیتے ہوئے اداکارہ نے کہا ہے کہ ان کے منع کرنے کے باوجود انہیں تحائف بھجوائے گئے، صرف چند تحفوں کی وجہ سے انہیں کیس میں شامل تفتیش کرنا ناانصافی ہے۔
دوسری جانب حکام کا دعویٰ ہے کہ اداکارہ کو معلوم تھا کہ انہیں جو رقم یا تحائف سکیش چندرا شیکھر کی جانب سے دی گئی ہے ان سے متعلق کیس چل رہا ہے۔
بھارتی میڈیا کے مطابق سکیش چندرا شیکھر نے سری لنکن نژاد بالی وڈ اداکارہ کو تحائف میں گھر، قیمتی کار، برانڈڈ بیگ اور دیگر اشیا دیں۔
اس سے قبل جیکولین فرنینڈس خود بھی اعتراف کرچکی ہیں کہ انھیں سکیش چندرا شیکھر نے ڈیڑھ لاکھ ڈالر کا قرض، 52 لاکھ بھارتی روپے کا گھوڑا اور 9 لاکھ بھارتی روپے کی بلی تحفے میں دی تھی۔
