جدہ : کورونا وائرس سے متعلق ایس او پیز پر عمل درآمد نہ کرنے اور خریداروں کو سہولیات کی عدم فراہمی پر جدہ میں واقع معروف شاپنگ سینٹر کو دوسری مرتبہ سربمہر کردیا گیا۔
تفصیلات کے مطابق جدہ کے بلدیہ حکام نے پرنس ماجد اسٹریٹ پر واقع معروف شاپنگ سینٹر کو احتیاطی تدابیر پر عمل نہ کرنے کی وجہ سے دوبارہ سیل کردیا ہے۔
غیر ملکی ذرائع ابلاغ کے مطابق ریجنل بلدیہ کے سیکرٹری محمد الزھرانی نے کہا ہے کہ وزارت صحت کی جانب سے کورونا وائرس سے بچاؤ اور عوام الناس کو اس وائرس سے محفوظ رکھنے کے لیے متعدد ضوابط وضع کیے گئے ہیں جن پر عمل کرنا لازمی ہے۔
ایسے ادارے اور شاپنگ سینٹرز جہاں مقررہ ایس او پیز پر عمل نہیں کیاجاتا ان کے خلاف فوری کارروائی کی جاتی ہے تاکہ لوگوں کو محفوظ رکھا جائے۔
مذکورہ شاپنگ سینٹر میں قائم ہائیپر مارکیٹ کے حوالے سے الزھرانی کا کہنا تھا کہ مارکیٹ میں ایس او پیز کی خلاف ورزی ریکارڈ کی گئی جس کی وجہ سے اسے دوسری بار بند کیا گیا ہے۔
واضح رہے کہ بلدیہ کے امور صحت کے ادارے کی جانب سے مقررہ قواعد وضوابط پر عمل درآمد کو یقینی بنانے کے لیے مختلف ٹیمیں تشکیل دی گئی ہیں ۔
مذکورہ ٹیمیں شہر میں موجود تجارتی اداروں اور مارکیٹس کا دورہ کرکے اپنی رپورٹ اور سفارشات متعلقہ ادارے کو ارسال کرتی ہیں جن کی روشنی میں بلدیہ کی مخصوص ادارہ فوری کارروائی کرتے ہوئے مارکیٹ یا تجارتی مرکز کے خلاف تادیبی کارروائی کرتا ہے۔
