اسلام آباد: ایئر یونیورسٹی کی شعور سوسائٹی نے کارپوریٹ سوشل ریسپانسبلیٹی سوسائٹی کے تعاون سے جعفر ایکسپریس حملے کے متاثرین سے اظہار یکجہتی کیلیے امن واک کا انعقاد کیا جس میں یونیورسٹی کے مختلف شعبہ جات سے بڑی تعداد میں طلبہ نے شرکت کی اور دہشتگردی کے خلاف یکجہتی کا مظاہرہ کیا۔
امن واک کے دوران طلبہ نے بینرز اور پلے کارڈز اٹھا رکھے تھے جن پر ’11 مارچ یوم سیاہ‘، ’ہم متحد ہیں‘، ’دہشتگردی ہمارا سفر نہیں روک سکتی‘ اور ’جعفر ایکسپریس ہمارے دلوں میں زندہ ہے‘ جیسے نعرے درج تھے۔
اس موقع پر امن، ہم آہنگی اور دہشتگردی کے خلاف سخت مذمت کا پیغام دیا گیا۔ امن واک کے دوران طلبہ نے دہشتگردوں اور دہشتگردی کے مرتکب عناصر کے خلاف سخت کارروائی کا مطالبہ کیا۔
نوجوانوں نے اس عزم کا اعادہ کیا کہ وہ ہر صورت امن کے فروغ اور دہشتگردی کی مذمت کیلیے اپنا کردار ادا کرتے رہیں گے۔
