کراچی/ حیدر آباد / سکھر : سندھ رینجرز نے صوبے کی اہم جیلوں میں سرچ آپریشن کرکے قیدیوں کے زیر استعمال ممنوعہ اور خطرناک اشیاء برآمد کرلیں۔
تفصیلات کے مطابق سندھ رینجرز نے سینٹرل جیل کراچی، حیدر آباد اور سکھر میں سرچ آپریشن کیا ہے، ڈی جی سندھ رینجرز کی سربراہی میں پورے جیل میں سرچ آپریشن کیا گیا۔
آپریشن کے دوران جیلوں کو مکمل بند کردیا گیا اور کسی قید کو بیرک سے باہر نکلنے کی اجازت نہیں تھی جب کہ قیدیوں سے طے شدہ ملاقاتیں بھی منسوخ کرادی گئیں۔
ترجمان رینجرز کے مطابق جیلوں میں اپنی نوعیت کا یہ منفرد آپریشن کافی عرصے بعد کیا گیا جس کے دوران قیدیوں کی بیرکوں سمیت جیل کے ہرحصے کی تلاشی لی گئی۔
اس حوالے سے ترجمان رینجرز کا کہنا ہے کہ مذکورہ آپریشن میں رینجرز کے مختلف ونگز نے حصہ لیا، تینوں جیلوں کے تمام بیرکس اور سیلز کی مکمل تلاشی لی گئی، بم ڈسپوزل اسکواڈ (بی ڈی ایس) کے عملے اور سونگھنے والے کتوں کی مدد سے مکمل سرچ آپریشن کیا گیا۔
ترجمان کے مطابق تلاشی کے دوران مختلف ممنوع اشیابرآمد کی گئیں، ٹیلی ویژن،بریکٹ فین، فریج، ایئر کولر، ناخن کٹر برآمد ہوئے، اس کے علاوہ قینچی، لائٹرز، سٹیپلرز، دستی گھڑی، گولڈ کی چینز بھی بیرکوں میں موجود تھیں۔
ریجنرز ترجمان کا مزید کہنا ہے کہ برآمد ہونے والی اشیاء میں پیڈسٹل فین اور اسٹیبلائزر بھی شامل ہے، سرچ اینڈ کامبنگ آپریشن دہشت گردی اور درپیش خطرات کے پیش نظر کیا گیا۔
