کراچی: صوبائی وزیر برائے صنعت و تجارت اور انسداد بدعنوانی و محکمہ امداد باہمی جام اکرام اللہ دھاریجو کا کرونا ٹیسٹ بھی مثبت آگیا ہے۔
اے آر وائی نیوز کے مطابق صوبائی وزیر جام اکرام اللہ دھاریجو چند دنوں سے تھکن اور ہلکا بخار محسوس کر رہے تھے، جس پر ان کا کرونا ٹیسٹ کیا گیا، جس کی رپورٹ آج مثبت آ گئی ہے۔
صوبائی وزیر نے خود کو اپنی رہائش گاہ پر قرنطینہ کر لیا ہے، انھوں نے دوست، احباب اور خیر خواہوں سے جلد صحت یابی کی دعاؤں کی درخواست بھی کر دی ہے۔
واضح رہے کہ آج وزیر اعلیٰ سندھ مراد علی شاہ کے کرونا وائرس ٹیسٹ کی رپورٹ بھی پازیٹو آئی ہے، جس پر انھوں نے ڈاکٹرز کی ہدایت پر خود کو قرنطینہ کر لیا ہے۔
وزیر اعلیٰ سندھ مراد علی شاہ کے کرونا ٹیسٹ کا نتیجہ آ گیا
وزیر اعلیٰ سندھ کے مطابق انھیں جمعے کو ہلکا بخار محسوس ہوا تھا، نماز جمعہ کے بعد انھوں نے کو وِڈ 19 کا ٹیسٹ کروایا جس کی رپورٹ مثبت آ گئی، ان کا کہنا تھا کہ انھیں ہلکا بخار ابھی بھی ہے تاہم باقی طبیعت ٹھیک ہے۔
گزشتہ ماہ پیپلز پارٹی کے سینئر رہنما اور وزیر اعلیٰ سندھ کے معاون خصوصی راشد ربانی کرونا وائرس انفیکشن سے انتقال کرگئے تھے، وہ کئی روز سے نجی اسپتال میں زیر علاج تھے اور انھیں انتقال سے دو دن قبل سانس لینے میں دشواری کی وجہ سے وینٹی لیٹر پر منتقل کیا گیا تھا۔
آج پنجاب اسمبلی میں کی جانے والی کرونا وائرس ٹیسٹنگ کے دوران عملے کے مزید 10 افراد میں بھی انفیکشن کی تصدیق ہوگئی ہے جس کے بعد پنجاب اسمبلی سے رپورٹ شدہ کو وِڈ 19 کیسز کی مجموعی تعداد 17 ہو گئی ہے۔
