The news is by your side.

Advertisement

جام کریم کی گرفتاری کا بیان : شیخ رشید و دیگر کیخلاف درخواست دائر

کراچی : ناظم جوکھیو کیس میں نامزد پیپلز پارٹی کے ممبر قومی اسمبلی جام کریم کو وطن واپسی پر گرفتار کرنے کے بیان کیخلاف آئینی درخواست دائر کردی گئی۔

سندھ ہائی کورٹ میں جام کریم کے وکیل کی جانب سے دائر کی گئی درخواست میں وزیرداخلہ شیخ رشید، گورنر سندھ عمران اسماعیل ودیگر کے خلاف توہین عدالت کے الزامات عائد کیے گئے ہیں۔

ناظم جوکھیو قتل کیس میں نامزد ملزم جام کریم کا نام ای سی ایل میں ڈالنے کے معاملے پر اہم پیشرفت سامنے آئی ہے۔

ایئرپورٹ ذرائع کا کہنا ہے کہ پیپلز پارٹی کے ممبر قومی اسمبلی جام کریم اعلان کے باوجود آج دبئی سے وطن واپس نہ پہنچے، جام کریم کو آج صبح7بجے پی کے612کے ذریعے اسلام آباد پہنچنا تھا۔

درخواست میں کہا گیا ہے کہ جام کریم نے مذکورہ کیس میں25مارچ کو حفاظتی ضمانت حاصل کی تھی ، جام کریم ٹرائل کورٹ میں پیش ہوکر سرنڈر کرنا چاہتے ہیں۔

وزیر داخلہ شیخ رشید نے ضمانت کے باوجود گرفتار کرنے کا اعلان کیا ہے، اس کے علاوہ گورنر سندھ نے بھی ان کا نام ای سی ایل میں شامل کرنے کے لیے حکومت کو خط لکھا۔

وکیل کی درخواست میں مؤقف ختیار کیا گیا ہے کہ فریقین جام کریم کوعدم اعتماد کی کارروائی میں شرکت سے روکنا چاہتے ہیںِ، شیخ رشید، عمران اسماعیل ودیگر کےخلاف توہین عدالت کارروائی کی جائے۔

واضح رہے کہ گزشتہ روز ذرائع کے حوالے سے یہ خبر سامنے آئی تھی کہ جام عبدالکریم نے پاکستان واپسی کی ٹکٹ بک کروالی ہے۔

ذرائع کا بتانا تھا کہ اسلام آباد میں وزیراعظم عمران خان کے خلاف عدم اعتماد کے معاملے سے قبل جام عبدالکریم 29 مارچ کی صبح غیر ملکی ایئر لائن ای کے612 سے اسلام آباد پہنچیں گے۔

Comments

یہ بھی پڑھیں