امیر جماعت اسلامی پاکستان حافظ نعیم الرحمان نے کہا ہے کہ آئی پی پیز مافیا کیخلاف 31جنوری کو ملک بھر میں احتجاج کریں گے اور دھرنے دینگے۔
تفصیلات کے مطابق جماعت اسلامی کے امیر حافظ نعیم الرحمان نے کہا کہ بجلی کے بل کم اور ناجائز ٹیکسز ختم کیے جائیں، پٹرول کی لیوی کم کی جائے، احتجاجی تحریک کو ازسرنو شروع کیا جائےگا، دھرنوں میں عوام کو روڈمیپ دیا جائیگا۔
انھوں نے کہا کہ سرکاری مراعات ختم، تنخواہ دار طبقے کو ریلیف دیا جائے، جاگیردار وں پر ٹیکس عائد کیا جائے، ہر دور میں عوام کا خون نچوڑا جاتا ہے، جاگیرداروں، وڈیروں، مافیا کو کھلی چھوٹ ہوتی ہے۔
حافظ نعیم الرحمان نے مزید کہا کہ اراکین پارلیمنٹ کی تنخواہوں میں 140 فیصد اضافہ شرمناک ہے، قوم حساب لےگی۔
امیر جماعت اسلامی نے کہا کہ حکومت کی جانب سے پی ای سی اے کے جاری ترمیمی آرڈیننس کو مسترد کرتے ہیں، پیکا آرڈیننس آزادی اظہار رائے اور صحافت کا گلہ گھوٹنے کے مترادف ہے۔
