جامشورو : دریجی سے بدین جانے والا ٹرک کھائی میں گرنے سے زخمی ہونے والے مزید 3 افراد جان کی بازی ہار گئے، حادثہ میں جاں بحق افراد کی تعداد 16 ہوگئی۔
اے آر وائی نیوز جامشورو کے نمائندے دلدار جانوری کی رپورٹ کے مطابق ریسکیو حکام کا کہنا ہے کہ ابتدائی طور پر جامشورو حادثہ میں 9 افراد موقع پر ہی لقمہ اجل بن گئے تھے جبکہ زخمی ہونے والے 28 افراد میں سے مزید 5 افراد زخموں کی تاب نہ لاتے ہوئے دوران علاج جان کی بازی ہار گئے جس کے بعد حیدرآباد لائے گئے مزید 3 زخمی دم توڑ گئے۔
ریسکیو حکام کے مطابق دیگر زخمیوں کو اسپتال میں طبی امداد فراہم کی جارہی ہے جس میں سے 3 کی حالت تشویشناک بتائی جارہی ہے، کمشنر حیدرآباد نے میڈیا کو بتایا کہ حادثے میں جاں بحق افراد کا تعلق بدین کے گاؤں راجوخانی سے ہے۔
ٹریفک حادثے میں مجموعی طور پر اب تک 4 بچوں اور 6 خواتین سمیت 16 افراد جاں بحق ہوگئے ہیں، جاں بحق ہونے والے افراد بلوچستان کے علاقے دریجی میں گندم کی کٹائی کی مزدوری کرکے واپس بدین جارہے تھے۔
اس حوالے سے ایس ایس پی جامشورو ظفر صدیق جھانگا نے میڈیا کو بتایا کہ بریک فیل ہونے کی وجہ سے ٹرک کھائی میں گرگیا تھا، مذکورہ ٹرک بلوچستان کے علاقے دریجی سے بدین جارہا تھا جس میں خواتین اور بچے بھی سوار تھے۔
وزیراعلیٰ سندھ نے رپورٹ طلب کرلی
وزیراعلیٰ سندھ مراد علی شاہ نے ٹرک حادثے میں 13 افراد کی ہلاکت کے واقعے پر اپنے گہرے دکھ اور رنج کا اظہار کیا ہے انہوں نے واقعے کا نوٹس لے لیا۔
ترجمان کے مطابق وزیراعلی سندھ نے کمشنر حیدرآباد سے حادثے کی مکمل رپورٹ طلب کرلی ہے، ان کا کہنا ہے کہ حادثے میں جاں بحق کولہی برادری کے لوگوں کے دکھ میں برابر کےشریک ہیں۔
وزیراعلیٰ سندھ نے کمشنرحیدرآباد کو ہدایت جاری کی ہے کہ جاں بحق افراد کی لاشیں ان کے آبائی علاقوں میں منتقل کی جائیں اور زخمیوں کو فوری طور پر حیدرآباد سول اسپتال منتقل کیا جائے،
مزید پڑھیں : بس کھائی میں گرنے سے 5 افراد جاں بحق ، 23 زخمی
یاد رہے کہ اس سے قبل گزشتہ سال ژوب کے علاقے دانہ سر میں بس کھائی میں گرگئی تھی جس کے نتیجے میں 5 افراد جاں بحق اور 23 زخمی ہوگئے تھے۔
ریسکیو حکام کا کہنا تھا کہ حادثہ تیز رفتاری کے باعث پیش آیا تھا، حادثے کی شکار زائرین کی بس اسلام آباد سے کوئٹہ جارہی تھی۔
