لاہور: پاکستان کی سرفہرست ٹک ٹاک اسٹار جنت مرزا نے مختصر ویڈیو شیئرنگ ایپ کی بندش پر ردعمل جاری کردیا۔
ٹک ٹاک بند ہونے کے بعد جنت مرزا نے انسٹاگرام پر ایپلیکیشن کی بندش پر حیران کن ردعمل دیا جسے دیکھ کر اُن کے مداح بھی حیران رہ گئے۔
ایک مداح نے جنت مرزا سے ٹک ٹاک کی بندش کے حوالے سے سوال کیا جس پر انہوں نے جواب دیا کہ ’مجھے ٹک ٹاک بند ہونے پر کوئی دکھ اور افسوس نہیں ہے‘۔
اُن کا کہنا تھا کہ ’مجھے کس بات کا دکھ اور افسوس ہوگا؟ جتنی عزت ،شہرت اور کام نصیب میں ہے وہ تو لازمی ملے گا، شاید ابھی تک مل بھی رہا ہے‘۔
جنت مرزا نے لکھا کہ ’مایوسی حرام ہے لہذا ہمیں کسی بھی فیصلے پر افسردہ نہیں ہونا چاہیے‘۔
View this post on Instagram
انہوں نے کہا کہ ’اگر ہم اس بات کا یقین کرلیں کہ یہ پابندی ہماری بہتری کے لیے ہے تو یقین کریں مایوسی، دکھ اور درد سب خود ہی ہم سے دور چلے جائیں گے، عزت، شہرت اور روزگار اگر نصیب میں ہوئے تو دوسرے ذرائع سے بھی ضرور ملیں گے‘۔
آخر میں جنت مرزا نے اس امید کا اظہار کیا کہ ’ٹک ٹاک پر عائد ہونے والی پابندی جلد ختم ہوجائے گی‘۔
واضح رہے کہ گزشتہ دنوں ایک شہری کی درخواست پر پشاور ہائی کورٹ نے مختصر ویڈیو شیئرنگ ایپ ٹک ٹاک پر پابندی عائد کرنے کا حکم جاری کیا تھا۔
View this post on Instagram
عدالتی فیصلے کی روشنی میں پاکستان ٹیلی کمیونیکیشن اتھارٹی نے بھی تمام انٹرنیٹ سروس فراہم کرنے والی کمپنیوں کو ٹک ٹاک سروس فوری بند کرنے کی ہدایت کی تھی۔
