ٹوکیو: جاپان میں طوفانی بارشوں اور سیلاب نے تباہی مچادی، مختلف حادثات میں 60 سے زائد افراد ہلاک جبکہ درجنوں افراد لاپتہ ہوگئے۔
تفصیلات کے مطابق جاپان کے مغربی اور وسطی علاقوں میں طوفانی بارشوں نے تباہی مچادی، مختلف حادثات میں 60 سے زائد افراد جان کی بازی ہار گئے۔
طوفانی بارشوں کے باعث سڑکیں زیرآب آگئیں جبکہ دریاؤں میں پانی کی سطح خطرناک حدتک بلند ہوگئی ہے۔
طوفانی بارشوں کے باعث آنے والے سیلابی ریلوں کی وجہ سے ملک کے مغربی اور وسطی علاقوں سے لگ بھگ 16 لاکھ افراد بے گھر ہوچکے ہیں۔
جاپانی حکومت نے سیلاب سے متاثرہ علاقوں میں امدادی سرگرمیوں کے لیے فوج طلب کرلی ہے، ہلاکتوں میں اضافہ ہونے کا خدشہ ہے۔
محکمہ موسمیات نے مرکزی جزیرے ہونشو کے 3 اضلاع کے رہائشیوں کو متنبہ کیا ہے کہ وہ شدید موسمی حالات سے خبردار رہیں۔
جاپانی محکمہ موسمیات نے مزید بارشوں کی پیشگوئی کرتے ہوئے کہا کہ یہ سلسلہ اتوار تک جاری رہے گا۔
واضح رہے کہ قدرتی آفات سے نمٹنے والے قومی ادارے نے شدید بارشوں والے علاقوں کے مزید 31 لاکھ افراد کو سیلاب کے خطرے کے پیش نظراپنا گھربار چھوڑنے کی ہدایت کی ہے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
