ٹوکیو: جاپان کی حکمران لبرل پارٹی کے صدر موجودہ وزیر اعظم فومیو کشیدا کی مدت ستمبر میں ختم ہو رہی ہے۔
جاپانی میڈیا رپورٹس کے مطابق جاپان کی مرکزی حکمران لبرل ڈیموکریٹک پارٹی (ایل ڈی پی) کے نئے صدر کا انتخاب 27 ستمبر کو کیا جائے گا، اس انتخاب کے ذریعے پارٹی کے صدر اور موجودہ وزیر اعظم فُومیو کِشیدا کے جانشین کا انتخاب کیا جائے گا۔
اس سلسلے میں منگل کو ایل ڈی پی کی انتخابی کمیٹی کا اجلاس ہوا، جس میں فیصلہ کیا گیا کہ 12 ستمبر کو اس سلسلے میں باضابطہ اعلان کیا جائے گا، یعنی انتخابی مہم کے لیے 15 دن دستیاب ہوں گے، یہ دورانیہ 1995 کے بعد سے طویل دورانیہ ہوگا۔
حکمران جماعت سیاسی اور مالی اسکینڈلوں کی وجہ سے چاہتی ہے کہ عوامی اعتماد کو بحال کیا جائے، اسی لیے بحث و مباحثے کے لیے زیادہ سے زیادہ وقت مختص کیا جائے گا۔
انتخاب کے دوران کُل 734 ووٹ ڈالے جائیں گے، ایل ڈی پی کے پارلیمانی قانون سازوں کے پاس 367 ووٹ ہیں، جب کہ باقی نصف کا فیصلہ جاپان بھر میں اِس جماعت کے مقامی ذمہ داران اور رجسٹرڈ اراکین کریں گے۔ قانون ساز اپنا ووٹ 27 ستمبر کو ڈالیں گے اور ووٹوں کی گنتی اُسی روز ہوگی۔
واضح رہے کہ ایل ڈی پی کے صدر کی حیثیت سے فومیو کِشیدا کی مدّت ستمبر کے آخر میں ختم ہو رہی ہے۔
