بھارت کی جانب سے خلائی مشن چاند پر بھیجنے کے بعد اب جاپان نے بھی اپنا خلائی مشن چاند پر بھیجنے کی تیاری کرلی ہے۔
بین الاقوامی خبر رساں ادارے کی رپورٹ کے مطابق اگست کے ماہ میں جاپانی چاند مشن کو لانچ کیا جانا تھا، مگر ناگزیر وجوہات کے باعث اب خلائی مشن 7 ستمبر 2023 کو لانچ کیا جائے گا، تاہم اس مشن کو چاند کے مدار میں پہنچنے میں تقریباً 4 سے 6 ماہ لگ سکتے ہیں۔
اسمارٹ لینڈر فار انویسٹی گیٹنگ مون (سلم) نامی یہ مشن چھوٹے اسپیس کرافٹ پر مشتمل ہوگا، جس کا وزن 200کلو گرام بتایا جارہا ہے۔
جاپانی حکام کا کہنا ہے کہ ہم اس مشن سے یہ ثابت کرنا چاہتے ہیں کہ جہاں چاہے چاند پر لینڈ کرسکتے ہیں، یہ مشن بھارتی چندریان 3 مشن کی سافٹ لینڈنگ تکنیک سے الگ قسم کا ہے۔
جے اے ایکس اے کا اپنے بیان میں کہنا ہے کہ پن پوائنٹ لینڈنگ ٹیکنالوجی کے باعث ہم سائنسی طور پر زیادہ اہم خاص مقامات کے قریب اسپیس کرافٹ کو لینڈ کراسکتے ہیں۔
ایسا پہلی بار ہو رہا ہے کہ جب جاپان ایرو اسپیس ایکسپلوریشن ایجنسی کی جانب سے چاند پر مشن بھیجا جارہا ہے، ایک نجی کمپنی نے اس سے قبل ایک مشن کو چاند پر بھیجنے کی کوشش کی تھی، مگر وہ مشن لینڈنگ میں کامیاب نہیں ہوسکا تھا۔
جاپانی مشن کے لئے کسی طاقتور راکٹ پر انحصار نہیں جارہا ہے، بلکہ بھارتی چندریان 3 مشن کی طرح پہلے زمین کے مدار میں داخل ہوگا، اس کے بعد چاند کی جانب بڑھ جائے گا۔
