جاپان میں چند دنوں کے دوران طیارے کا دوسرا حادثہ پیش آیا ہے۔ ایئرپورٹ پر 2 مسافر ہوائی جہاز آپس میں ٹکراگئے جس کی ویڈیو وائرل ہوگئی۔
غیرملکی میڈیا رپورٹس کے مطابق جنوبی کوریا کا ایک طیارہ ہانگ کانگ کے کیتھے پیسفک طیارہ سے ہوکائیڈو میں نیوچیٹوس ہوائی اڈے پرٹکرا گیا، خوش قسمتی سے اس حادثہ میں کسی کی ہلاکت نہیں ہوئی۔
جاپانی ایئرپورٹ پر محض چند دنوں کے دوران ایک بار پھر سے دو طیاروں کے آپس میں ٹکرانے پر ماہرین تشویش کا اظہار کررہے ہیں۔
میڈیا رپورٹس میں بتایا گیا ہے کہ ہانگ کانگ کا کیتھے پیسفک طیارہ ہوائی اڈے پر کھڑا تھا، اس دوران جنوبی کوریا کی ایئرلائن کے آگے بڑھنے والے طیارہ نے اسے ٹکر مار دی، جس کے بعد ایئرپورٹ پر افراتفری پھیل گئی۔
#WATCH : Footage of moment when Korean Air & Cathay Pacific passenger aircraft collided at the Hokkaido airport, Japan.#KoreanAirPlane #CathayPacificAirways #Japan #PlaneCrash #PlaneCollision #JUSTIN #Hokkaido #NewChitoseAirport pic.twitter.com/PHclrD562h
— upuknews (@upuknews1) January 16, 2024
جاپانی لوکل میڈیا ’فجی ٹی وی‘ نے اس حوالے بتایا کہ ایک مسافر طیارہ ہوائی اڈے پر کھڑا تھا اور دوسرے مسافر طیارہ کی لینڈنگ تقریباً مکمل ہو چکی تھی۔ اس لیے ان کی ٹکر شدید نہیں تھی، فی الحال کسی جانی یا مالی نقصان کی اطلاع نہیں ملی۔
کورین ایئرلائنز کے ترجمان نے بتایا کہ اس حادثے میں کوئی زخمی نہیں ہوا۔ واقعہ 16 جنوری کو کوریائی ایئرلائن کی جانب سے پرواز بھرنے سے قبل پیش آیا۔
میڈیا رپورٹس میں یہ بھی بتایا جا رہا ہے کہ طیارہ کو پارکنگ والی جگہ پر ڈی-آئسنگ آپریشن پورا کرنے کے بعد گراؤنڈ ہینڈلنگ کمپنی کا ٹریکٹر کھینچ رہا تھا۔ اس کھیچنے کے عمل کے دوران زمین پر برف کی وجہ سے ٹریکٹر پھسل گیا۔
اس حوالے سے کورین ایئرلائن کے حکام نے بتایا کہ طیارہ کا بایاں پنکھا پارکنگ والی جگہ پر کھڑے کیتھے پیسفک کی پرواز سی ایکس 583 سے ٹکرا گیا تھا۔
واضح رہے کہ اس سے قبل 2 جنوری کو جاپان میں رن وے پر دو طیاروں کی ٹکر ہو گئی تھی جس کے باعث 6 افراد ہلاک ہو گئے تھے۔ حادثہ کے سبب دونوں طیاروں میں آگ لگ گئی تھی۔
