جاپان کی حکومت نے اپنے قومی ذخیرے سے دوسری بار چاول کی نیلامی کا آغاز کردیا ہے تاکہ چاول کی تقسیم اور قیمتوں میں استحکام لایا جاسکے۔
غیرملکی میڈیا رپورٹس کے مطابق گزشتہ ایک سال کے دوران جاپان کی سپر مارکیٹوں میں چاول کی قیمتیں دوگنی سے زیادہ ہو گئی ہیں، اسی کے پیش نظر جاپانی حکومت نے چاول کی تقسیم اور قیمتوں کو مستحکم کرنے کےلیے یہ اقدام کیا ہے۔
جاپانی وزارت زراعت نے بدھ کے روز قومی ذخیرے سے چاول کی دوسری نیلامی شروع کی ہے، وزارت 3 روزہ بولی کے دوران ملک کے 70,000 ٹن چاول منڈی میں لانے کا ارادہ رکھتی ہے۔
جاپان میں غیر ملکیوں کیلیے ملازمت کا شاندار موقع
وزارت کے عہدیداروں نے چاول کی فروخت کے سلسلے میں کم سے کم قیمت مقرر کی ہے، تھوک فروش ای میل کے ذریعے اپنی بولی جمع کراسکتے ہیں۔
ایسی صورت میں کہ مذکورہ اناج کا کچھ حصہ فروخت ہونے سے رہ گیا تو وزارت زراعت جمعرات کو ایک اور بولی لگانے کا ارادہ رکھتی ہے۔
فیڈریشن نے منگل کے روز بتایا تھا کہ نیلامی میں خریدے گئے زیادہ تر چاول کے اسٹاک اگلے ماہ سے ریٹیل اسٹورز پر فروخت کیلئے پیش کیے جائیں گے۔
خیال رہے کہ جاپان نے رواں ماہ کے اوائل میں پہلی نیلامی میں اپنے ہنگامی ذخائر سے ایک لاکھ 50 ہزار ٹن چاول فروخت کے لیے پیش کیے تھے، زرعی تعاون کی ایک فیڈریشن نے فروخت شدہ چاول کا 90 فیصد سے زائد حصہ خرید لیا تھا۔
