ٹوکیو : جاپان میں اسٹریس یا ذہنی تناؤ کو کم کرنے کے لیے غیر روایتی طریقے سے ایک ہزار گھروں میں چوری چھپے داخل ہونے والا شخص پکڑا گیا۔
اس حوالے سے جاپانی میڈیا کی ایک رپورٹ میں بتایا گیا ہے کہ پولیس نے ایک ایسے شخص کو گرفتار کیا ہے جس نے دوران تفتیش اس بات کا برملا اعتراف کیا کہ وہ اسٹریس یا ذہنی تناؤ کو کم کرنے کے لیے ایک ہزار سے زائد گھروں میں چوری چھپے داخل ہوا۔
جاپانی اخبار مینیچی شمبن کی ایک رپورٹ میں بتایا گیا ہے کہ پولیس نے 37 سالہ شخص کو پیر کے روز فوکوکا پریفیکچر کے شہر دازائیفو میں ایک گھر میں غیر قانونی طور پر داخل ہونے کے شبہ میں حراست میں لیا تھا۔
ملزم (جس کا نام طاہر نہیں کیا گیا ہے) کا کہنا تھا کہ دوسروں کے گھروں میں چوری چھپے گُھسنا میرا شوق ہے اور میں یہ ایک ہزار سے زیادہ مرتبہ کرچکا ہوں۔
پولیس کو دیئے گئے بیان میں اس کا کہنا تھا کہ مجھے اس قدر جوش آجاتا ہے کہ میری ہتھیلیاں پسینے سے بھر جاتی ہیں، اور جب میں یہ سوچتا ہوں کہ کوئی مجھے پکڑ لے گا یا نہیں تو اس سے میرا ذہنی تناؤ کچھ کم ہو جاتا ہے۔
واضح رہے کہ ایک رپورٹ کے مطابق جاپان میں 40 سے 49 سال کی عمر کے لوگوں میں ذہنی تناؤ کی شرح زیادہ ہے اور لگ بھگ 50 فیصد مرد ذہنی تناؤ کا شکار ہیں جبکہ 30 سے 49 سال کی عمر کی جاپانی خواتین میں ذہنی تناؤ کی سب سے زیادہ شکایت پائی جاتی ہے۔
