پاکستان کی ریڈ بال ٹیم کے ہیڈ کوچ جیسن گلیسپی نے مستعفی ہونے کا فیصلہ کرلیا۔
اے آر وائی نیوز کے مطابق پاکستان کرکٹ بورڈ (پی سی بی) کے لیے ایک اور مشکل کھڑی ہوگئی، گیری کرسٹن کے بعد جیسن گلیسپی نے بھی مستعفی ہونے کا فیصلہ کرلیا۔
ذرائع کا کہنا ہے کہ جیسن گلیسپی نے جنوبی افریقا جانے سے انکار کردیا ہے وہ اپنے اسسٹنٹ ٹم نیلسن کے معاہدے میں توسیع نہ ہونے پر نالاں ہیں۔
گلیسپی نے ذاتی وجوہات کا کہہ کر بورڈ کو جنوبی افریقہ نہ جانے سے متعلق بتادیا ہے جبکہ وہ جلد استعفیٰ بھی دے دیں گے۔
واضح رہے کہ پاکستان کے وائٹ بال ہیڈ کوچ گیری کرسٹن اکتوبر میں مستعفی ہوئے تھے۔
یاد رہے کہ پاکستان کرکٹ بورڈ نے جیسن گلیسپی کو مستقبل میں ذمے داریاں نہ دینے کا فیصلہ کیا تھا۔
ذرائع کا مزید کہنا ہے کہ وائٹ بال کے عبوری ہیڈکوچ عاقب جاوید کے ریڈ بال میں ذمے داریاں جاری رکھنے کا امکان ہے۔
اس سے قبل جمعرات کو یہ خبر سامنے آئی تھی کہ پی سی بی نے جنوبی افریقا کے خلاف ٹیسٹ سیریز کے لیے ہائی پرفارمنس ریڈ بال کوچ ٹم نیلسن کے معاہدے میں توسیع نہیں کی ہے۔
پاکستان اور جنوبی افریقہ کے درمیان پہلا ٹیسٹ 26 دسمبر کو کھیلا جائے گا جبکہ پاکستان اور جنوبی افریقا کے درمیان دوسرا ٹی 20 کل سنچورین میں کھیلا جائے گا۔
