ممبئی: بھارت میں متنازع شہریت ایکٹ کے خلاف احتجاجی مظاہرے شدت اختیار کرگئے ہیں، بھارت کے مختلف شہروں میں پولیس سے جھڑپوں میں ہلاکتوں کی تعداد 20 ہوگئی۔
تفصیلات کے مطابق بھارت میں احتجاج پر شاہ رخ، عامر اور سلمان خان نے چپ کا روزہ رکھا ہوا ہے لیکن کچھ بالی ووڈ اداکار ایسے بھی ہیں جنہوں ںے مسلم مخالف قانون پر مودی کو آڑے ہاتھوں لیا۔
اداکار شبانہ اعظمی نے چند روز قبل بھارتی حکومت کے شہریت قانون میں ترمیم کرنے کے خلاف اپنی آواز بلند کرتے ہوئے تمام شہریوں سے پرامن مظاہرے کرنے کی اپیل کی تھی۔
انہوں نے ایک اور ویڈیو میں جاوید اختر کے دو اشعار پڑھتے ہوئے مودی سرکار کو مخاطب کیا اور مطالبہ کیا کہ وہ احتجاجی مظاہرین کے مطالبے کو سُنے اور مجھے یقین ہے سرکار ہماری آواز کو سنے گی۔
اداکار جاوید جعفری نے مسلم مخالف قانون پر بھرے مجمع میں شاعر سرشار سیلانی اور راحت اندروی کی نظموں کے اشعار سنائے۔
سبھی کا خون ہے شامل یہاں کی مٹی میں
کسی کے باپ کا ہندوستان تھوڑی ہے
اداکار نے احتجاجی مظاہرے میں مزید کہا کہ مودی کیوں ہندوستان کے مسلمانوں کو لڑانے میں لگ گئے ہیں، بے روزگاری اور خراب معیشت پر توجہ دی جائے۔
یاد رہے کہ چند روز کی خاموشی اختیار کرنے پر اب بالی ووڈ اداکار بھی مسلم مخالف ایکٹ پر اپنی رائے کا اظہار کررہے ہیں، کنگنا رناوت، ریتھک روشن، ریتیش دیش مکھ، شبانہ اعظمیٰ سمیت دیگر اداکاروں نے مودی سرکار کے اس اقدام پر انہیں آڑے ہاتھوں لیا ہے۔
