کراچی: وزیراعطم عمران خان کے پرانے ساتھی اور قومی کرکٹ ٹیم کے سابق کوچ جاوید میاں داد نے ڈیپارٹمنٹل کرکٹ یا اسپورٹس بند کرنے کے حکومتی فیصلے کی کھل کر مخالفت کردی۔
تفصیلات کے مطابق وزیر اعظم عمران خان نے گزشتہ دنوں پاکستان کرکٹ بورڈ حکام سے ملاقات میں محکمہ جاتی (ریپارٹمنٹ) کرکٹ بند کرنے اور اسے علاقائی (ریجینل) سطح پر مضبوط کرنے کا فیصلہ کیا تھا۔وزیر اعظم کے اس اقدام کا مقصد علاقائی سطح پر کرکٹ اور دیگر کو مضبوط کرنا ہے تاکہ نیا ٹیلنٹ سامنے آسکے۔
عمران خان کے فیصلے پر لیجنڈری کرکٹر جاوید میاں داد نے مخالفت کرتے ہوئے وزیر اعظم کو آڑے ہاتھوں لیا۔ اپنے پیغام میں اُن کا کہنا تھا کہ ’عمران خان نے خود ساری زندگی پیسوں کے لیے کاؤنٹی کرکٹ کھیلی اور آج کو ڈیپارٹمنٹ کرکٹ بند کرکے کھلاڑیوں کو بے روزگار کر رہے ہیں‘۔
مزید پڑھیں: بھارت کے خلاف پان کھا کر تاریخی چھکا مارا تھا، جاوید میاں داد
اُن کا کہنا تھا کہ ’عمران خان سے امید تھی کہ وہ کھیلوں کے لیے اچھے اقدامات کریں گے، اگر میں حکومت میں ہوتا یا اس کا حصہ ہوتا تو کھلاڑیوں کو اصل تبدیلی نظر آتی‘۔
دوسری جانب اولمپئن اصلاح الدین اور اسکواش کنگ جہانگیر خان نے بھی ڈیپارٹمنٹل اسپورٹس بند کرنے کی مخالفت کرتے ہوئے کہا کہ ’حکومتی اقدام سے کھلاڑیوں کا معاشی قتل ہوگا’۔
کھلاڑیوں کی حمایت کرتے ہوئے اُن کا کہنا تھا کہ ’ڈیپارٹمنٹس کی ٹیموں نے اسپورٹس کے میدان کو بڑے کھلاڑی دیے جنہوں نے عالمی سطح پر بھی ملک کا نام روشن کیا‘ْ
