پاکستان شوبز انڈسٹری کی سینئر اداکارہ جویریہ عباسی نے کہا ہے کہ بچے والدین کی دوسری شادی کرانے پر راضی نہیں ہوتے، یہ افسوسناک بات ہے۔
اداکارہ نے حال ہی میں میرے دوسرے شوہر کے ہمراہ ایک انٹرویو دیا جہاں انہوں نے بچوں کا والدین کی دوسری شادی پر دیے جانے والے ردعمل پر اظہارِ خیال کیا ہے۔
اداکارہ نے کہا کہ اکثر ہم دیکھتے ہیں کہ اگر والدین میں سے کسی ایک کا انتقال ہوجائے اور وہ شادی کرنا چاہیں تو بچے کہتے ہیں کہ نہیں یہ ہو ہی نہیں سکتا۔
جویریہ عباسی نے کہا ہمارے یہاں ایسا نہیں ہوتا کہ بچے کہیں چلو ماں یا باپ تنہا ہیں تو اس کی شادی کرا دی جائے، اگر کرلیں تو بچے ساری زندگی دل میں رنجش رکھتے ہیں کہ انہوں نے شادی کیوں کی، یہ انتہائی غلط بات ہے۔
View this post on Instagram
سینئر اداکارہ نے کہا بچوں کو سمجھنا چاہیے کہ ان کے والدین انسان ہیں، ان کی اپنی ضرورتیں ہیں، انہیں بھی ذہنی طور پر سکون کی ضرورت ہے، اس لیے بچوں کو والدین کو بھی اپنی زندگی میں کچھ کرنے دینا چاہیے۔
’’کیوں کہ بچے بڑے ہونے کے بعد شادی کرکے اپنے گھروں کو چلے جاتے ہیں لیکن ماں بیچاری اکیلی رہ رہی ہوتی ہے، کیونکہ ان کے شوہر پتہ نہیں کتنے عرصہ پہلے اللہ کو پیارے ہوگئے تھے، میری نزدیک یہ بہت افسوسناک بات ہے‘‘
اداکارہ جویریہ نے مزید کہا کہ جب آپ کے قرآن نے آپ کو اجازت دی ہے، آپ کے دین اور قانون نے اجازت دی ہے تو کیا مسئلہ ہے؟ اگلے کو جینے دینا چاہیے۔
یاد رہے کہ جویریہ عباسی نے رواں برس مئی میں سوشل میڈیا پر اپنی منگنی کا اعلان ایک ویڈیو کے ذریعے کیا تھا، جبکہ اداکارہ کا نکاح عدیل حیدر سے رواں برس 15 مارچ کو ہوا جس کی چھوٹی سی تقریب گھر میں ہی منعقد کی گئی۔
واضح رہے کہ جویریہ عباسی کی پہلی شادی سال 1997 میں اداکار شمعون عباسی سے ہوئی تھی اور شادی کے 12 سال بعد 2009 میں ان دونوں کی طلاق ہوگئی تھی۔
