دبئی: انٹرنیشنل کرکٹ کونسل (آئی سی سی) نے پاکستان کی جویریہ خان کو آئی سی سی ویمن ڈیولپمنٹ اسکواڈ کا کپتان مقرر کردیا۔
تفصیلات کے مطابق آئی سی سی کی جانب سے پاکستانی ویمن ٹیم کی کرکٹر جویریہ خان کو آئی سی سی ویمن ڈیولپمنٹ اسکواڈ کی کپتان مقرر کیا گیا ہے، آئی سی سی ویمن گلوبل ڈیولپمںٹ اسکواڈ میں 7 ملکوں سے خواتین کھلاڑی شامل کی گئی ہیں۔
اسکواڈ انگلینڈ میں مختلف ٹیموں کے خلاف 6 ٹی ٹوینٹی میچز کھیلے گا، اسکواڈ کی دیگر کھلاڑیوں کا تعلق ایسوسی ایٹ ممالک سے ہے۔
جویریہ خان کا کہنا تھا کہ ویمن ڈیولپمنٹ اسکواڈ کا کپتان مقرر کیا جانا میرے لیے اعزاز کی بات ہے، دوسرے ممالک کی ٹیم کی کھلاڑیوں کے ساتھ کھیل کر انفرادی کارکردگی بہتر بنانے میں مدد ملے گی۔
Great stuff. All the best @ImJaveria https://t.co/9V17DOll3X
— Sana Mir ثناء میر (@mir_sana05) July 25, 2019
قومی ویمن کرکٹ ٹیم کی سابق کپتان ثنا میر نے سماجی رابطے کی ویب سائٹ ٹویٹر پر اپنے پیغام میں جویریہ خان کو مبارک باد دیتے ہوئے نیک خواہشات کا اظہار کیا۔
آئی سی سی کا کہنا ہے کہ ویمن ڈیولپمنٹ اسکواڈ کا مقصد خواتین کرکٹر کے کھیل کو بہتر بنانا ہے، اس سے قبل انگلینڈ کرکٹ بورڈ ڈبلیو جی ڈی ایس پروگرام نومبر اور جولائی 2018 میں منعقد کرچکا ہے۔
ویمن ڈیولپمنٹ اسکواڈ اپنا پہلا میچ 29 جولائی کو انگلینڈ ویمن اکیڈمی کے درمیان کھیلے گی جبکہ دوسرا میچ 31 جولائی کو ساؤڈرن وائپرز کے درمیان کھیلا جائے گا۔
اسی طرح جمعہ 2 اگست کو ویمن ڈٰولپمنٹ اسکواڈ کی ٹیم سرے اسٹارز کا سامنا کرے گی۔
