بھارتی کرکٹ بورڈ کے سیکریٹری جے شاہ نے کہا ہے کہ ویرات کوہلی اور روہت شرما جیسے پلیئرز کو دلیپ ٹرافی کھیلنے کے لے مجبور نہیں کیا جاسکتا۔
دلیپ ٹرافی کا بھارت میں جلد انعقاد ہونے والا ہے جس میں بھارت کے کئی سپر اسٹار کرکٹرز حصہ لیں گے، پہلے ممکنہ طور پر اس ایونٹ میں حصہ لینے کے ویرات کوہلی اور روہت شرما کے نام بھی سامنے آئے تھے، تاہم اب فائنل اسکواڈ میں دونوں پلیئرز کا نام موجود نہیں ہے۔
بھارتی کرکٹ کے بڑے ناموں میں سے چند قابل ذکر نام جن میں کپتان روہت شرما، ویرات کوہلی اور جسپریت بمراہ شامل ہیں وہ اس ڈومیسٹک ایونٹ سے غیر حاضر ہونگے۔
ڈومیسٹک ایونٹ کے لیے جب ٹیم اے، ٹیم بی، ٹیم سی اور ٹیم ڈی کے لیے اسکواڈ کا اعلان کیا گیا تو بھارتی ٹیم کے دونوں سینئر ترین کھلاڑیوں کے نام موجود نہیں تھے۔
بی سی سی آئی کے سیکریٹری جے شاہ کے مطابق ان کی ترجیح اس بات کو یقینی بنانا ہے کہ روہت اور کوہلی اس سال کے آخر میں آسٹریلیا میں ہونے والی پانچ میچوں کی ٹیسٹ سیریز کے لیے فٹ ہوں۔
انھوں نے کہا کہ ہمیں دلیپ ٹرافی میں کھیلنے کے لیے روہت اور ویرات جیسے کھلاڑیوں پر زور نہیں ڈالنا چاہیے، ان کے انجرڈ ہونے کا خطرہ ہوسکتا ہے۔
اگر آپ نے غور کیا ہو تو آسٹریلیا اور انگلینڈ میں ہر انٹرنیشنل کھلاڑی ڈومیسٹک کرکٹ نہیں کھیلتا۔ ہمیں کھلاڑیوں کے ساتھ عزت کے ساتھ پیش آنا ہوگا۔
جے شاہ نے کہا کہ ایونٹ میں کوہلی اور روہت کے علاوہ باقی سب کھیل رہے ہیں، آپ کو اس چیز کی تعریف کرنی چاہیے، اس کے علاوہ ایشان کشن اور شریاس آئر بوچی بابو ٹورنامنٹ میں کھیل رہے ہیں۔
