جہلم: صوبہ پنجاب کے شہر جہلم میں 15 سال کی لڑکی کو چلتی گاڑی میں زیادتی کا نشانہ بنادیا گیا۔
اے آر وائی نیوز کے مطابق صوبہ پنجاب کے شہر جہلم میں 15 سالہ لڑکی کو چلتی گاڑی میں زیادتی کا نشانہ بنانے والے ڈرائیور کو گرفتار کرلیا گیا۔
ڈی پی او جہلم کا کہنا ہے کہ میری اور ایس پی انویسٹی گیشن کی طالبہ اور والدہ سے ملاقات ہوئی ہے، ابتدائی بیان ریکارڈ کراتے ہوئے طالبہ کا کہنا تھا کہ مدرسے سے آتے ہوئے زیادتی کا نشانہ بنایا گیا۔
حماد عابد کے مطابق طالبہ تلہ گنگ میں مدرسے سے آرہی تھی، دینہ اسٹاپ پر گاڑی میں تنہا رہ گئی تھی اسے ڈرائیور نے اپنی ہوس کا نشانہ بنایا۔
پولیس کے مطابق ریسکیو اہلکاروں کو طالبہ بے ہوشی کی حالت میں ملی تھی، سواریوں سے تصدیق کرنے کے بعد معلوم ہوا ہے کہ گاڑی میں کنڈیکٹر موجود نہیں تھا۔
ڈی پی او جہلم حماد عابد نے اے آر وائی نیوز سے گفتگو کرتے ہوئے کہاکہ طالبہ کا طبی معائنہ اور سیمپلز پی ایف ایس اے لاہور بھجوائے جاچکے ہیں، طالبہ کی والدہ کی مدعیت میں مقدمہ درج کرلیا گیا ہے۔
