لندن: ٹوری پارٹی قیادت کی دوڑ میں شامل وزیر خارجہ جیرمی ہنٹ نے متنبہ کیا ہے کہ اگر ان کی پارٹی نے نوڈیل بریگزٹ پر بریگزٹ کی کوشش کی تو یہ ان کی پارٹی کے لیے خودکشی کے مترادف ہوگا۔
غیرملکی خبررساں ادارے کے مطابق جیرمی ہنٹ تھریسامے کی جگہ قیادت حاصل کرنے کے لیے دوڑ میں شامل 10 امیدواروں میں شامل ہیں جبکہ وزیر ماحولیات مائیکل گوو نے یورپی یونین کے شہریوں کو ریفرنڈم کے وقت کسی فیس کے بغیر برطانوی شہریت دینے کا مطالبہ کرتے ہوئے اپنی انتخابی مہم کی راہ ہموار کرنا شروع کی ہے۔
رپورٹ کے مطابق بریگزٹ کے حامی وزیر ماحولیات نے ایک کھلی اور فراخدلانہ پیش کش کی ہے بین الاقوامی ترقی سے متعلق امور کے وزیر روری اسٹیورٹ نے بریگزٹ پر موقف سننے کا وعدہ کیا ہے۔
مزید پڑھیں: پاکستانی نژاد ساجدجاوید کا کنزر ویٹو پارٹی کے الیکشن لڑنے کا اعلان
جیرمی ہنٹ نے کہا کہ اگر بریگزٹ سے پہلے عام انتخابات ہوئے تو کنزرویٹو پارٹی صفحہ ہستی سے مٹ جائے گی، میرا شروع سے ہی یہ موقف رہا ہے کہ نوڈیل نو بریگزٹ سے بہتر ہے۔
انہوں نے کہا کہ نوڈیل کی وکالت کرنے والا وزیراعظم پارلیمںٹ سے اعتماد کا ووٹ کھو دے گا اور عام انتخابات کا انعقاد بھی ایسا ہی ہوگا، عام انتخابات کے ذریعے نوڈیل کوئی حل نہیں بلکہ یہ سیاسی خودکشی ہوگی۔
جریمی ہنٹ نے کہا کہ اگر میں جیت گیا تو یورپی یونین سے ایک نئے معاہدے کی کوشش کریں گے۔
