نیو یارک : جان ایف کینیڈی انٹرنیشنل ائیرپورٹ پر پالتو جانوروں کے لیے باتھ روم کی سہولت مہیا کردی گئی ہے۔
تفصیلات کے مطابق نیویارک کے ’جے ایف کے‘ ائیر پورٹ پر مسافروں کے ساتھ پالتو جانوروں کی آمد کی پیش نظر ان کے لیے باتھ روم کی سہولت مہیا کردی گئی ہے۔
یاد رہے کہ مسافر وں کواپنے ساتھ لائے جانوروں کو رفع حاجت کے لئے ائیر پورٹ کی حدود سے باہر لے جانا پڑتا تھا تاہم ابسیکوریٹی کے پیش نظر یہ سہولت ائیرپورٹ کے اندر ہی موجود ہے ۔
حکام کا کہنا ہے کہ ’’جب ہم نے دیکھا کہ بہت سارے مسافر اپنے ہمراہ سفر کرنے کی غرض سے پالتو جانور ائیرپورٹ لاتے ہیں تو ہم نے فیصلہ کیا کہ مسافروں کی پریشانی کو دور کرنے کے لئے یہ سہولت مہیا کی جائے ۔70 اسکوائر فٹ کے رقبے پر بنے ایک کمرے میں پالتو جانوروں کے بیت الخلا ء کے انتظامات کئے گئے ہیں‘‘۔
پالتو جانوروں کے واش روم کی سہولت مرد اور خواتین کے باتھ روم کے درمیان بنائی گئی ہے ۔ استعمال کرنے والے مالک کو ایک تھیلی دی جاتی ہے جسے استعمال کرنے کے بعد وہ ایک مخصوص نالی میں رکھ دیتا ہے ، جبکہ اگلے جانور کے استعمال سے قبل اس جگہ کو صاف کردیا جاتا ہے ۔ائیر پورٹ حکام کے مطابق مسافروں کی جانب سے اس عمل کو قدر کی نگاہ سے دیکھا جارہا ہے ۔
فیڈرل ریگولیشن کے ایک محتاط اندازے کے مطابق ہر سال مسافروں کے ساتھ تقریباً دس ہزار کے قریب پالتو جانور بھی سفر کرتے ہیں ، مسافر جانوروں کی اس کثیر تعداد کو مدنظر رکھتے ہوئے اس سال اگست تک واشنگٹن ڈی سی کے تمام ہوائی اڈوں پر بھی یہ سہولت فراہم کرنے کا فیصلہ کیاگیا ہے ۔
واضح رہے کہگزشتہ دنوں اسی ہوائی اڈے پر ٹریلر رابن نامی شخص نے فلائٹ تاخیرکا شکار ہونے پراپنے کتے کو رفع حاجت کے لیے ایئرپورٹ سے باہر لے جانے کی کوشش کی تاہم سیکیورٹی حکام نے اس ے روک لیا۔
رابن نے اپنی اس پریشانی پر انتظامیہ کو اس معاملے سے آگاہ کیا تھا جس کے بعد انتظامیہ نے ایئرپورٹ پر جانوروں کے لیے بیت الخلا بنانے کا فیصلہ کیا۔ دیگر مسافروں کی جانب سے اس تجویز کو بے حد سراہا گیا ہے اور اس اقدام پر انہوں نے انتظامیہ کا شکریہ بھی ادا کیا ہے ۔