کراچی: جماعت اسلامی نے بجلی کے بلز میں کے ایم سی ٹیکس کی وصولی کے معاملے پر میئر کراچی مرتضیٰ وہاب کے خلاف توہین عدالت کی درخواست دائر کر دی۔
سندھ ہائی کورٹ میں درخواست جماعت اسلامی کے اپوزیشن لیڈر سٹی کونسل سیف الدین نے دائر کی جس کے متن میں کہا گیا کہ میئر کراچی نے کمیٹی کے قیام اور کونسل سے منظوری کا بیان حلفی جمع کروایا تھا۔
مرتضیٰ وہاب نے سروسز چارجز کے علاوہ اضافی کٹوتی نہ ہونے کی یقین دہانی کروائی تھی اور 300 یونٹ سے کم استعمال والے صارفین پر ٹیکس نہ لگانے کی یقین دہانی کروائی تھی۔
سیف الدین ایڈووکیٹ نے اپنی درخواست میں کہا کہ میونسپل کمشنر نے 31 مئی کو کمیٹی کے قیام کا نوٹیفکیشن جاری کیا، کمیٹی کے سربراہ میئر اور 8 ارکان کمیٹی کا حصہ تھے، 3 جون کو پہلی میٹنگ میں پی ٹی آئی پارلیمانی لیڈر کا تنازع سامنے آیا۔
درخواست گزار نے کہا کہ پیپلز پارٹی کے پارلیمانی لیڈر نے تنازع حل کر کے پھر میٹنگ کی یقین دہانی کروائی، اپوزیشن جماعتوں کو میٹنگ کیلیے اطلاع ہی نہیں دی گئی، 10 جون کوسٹی کونسل کے اجلاس میں میونسپل ٹیکس کا معاملہ شامل نہیں تھا، اجلاس سے چند منٹ پہلے میونسپل ٹیکس کا معاملہ ضمنی ایجنڈے میں شامل کیا گیا۔
رہنما جماعت اسلامی نے اپنی درخواست میں مؤقف اختیار کیا کہ میئر کراچی نے جلد بازی میں میں میونسپل ٹیکس کی قرارداد پیش کی، قرارداد پر گنتی کے بغیر ہی میئر کراچی نے قرارداد منظوری کا اعلان کیا، میئر نے واضح طور پر عدالت میں پیش بیان حلفی کی خلاف ورزی کی۔
درخواست گزار نے کہا کہ عدالتی احکامات پر عمل نہ کرنے میئر کراچی توہین عدالت کے مرتکب ہوئے لہٰذا ان کے خلاف توہین عدالت کی کارروائی کی جائے اور ان کو کے-الیکٹرک سے میونسپل ٹیکس کی وصولی معاہدے سے روکا جائے۔
