The news is by your side.

Advertisement

آج 15 اکتوبر کو جناح ایکسپریس کے کرایے آدھے وصول کیے جائیں گے

کراچی: جناح ایکسپریس میں اکانومی کلاس کی بوگیوں کا اضافہ کر دیا گیا ہے، آج 15 اکتوبر سے بوگیاں لگائی جائیں گی۔

تفصیلات کے مطابق جناح ایکسپریس کی اکانومی کلاس کی بوگیوں میں اضافہ کر دیا گیا، آج سے اضافی بوگیاں لگائی جا رہی ہیں، وزیر ریلوے نے آج 15 اکتوبر کے لیے جناح ایکسپریس کا آدھے کرائے کا بھی اعلان کر دیا ہے۔

وزیر ریلوے شیخ رشید نے کہا کہ منگل کے دن جناح ایکسپریس کا کرایہ آدھا وصول کیا جائے گا، کراچی سے لاہور تک کرایہ 1825 سے کم کر کے 950 کر دیا گیا، جناح ایکسپریس کے کرائے میں یہ کمی صرف آج 15 اکتوبر کے لیے ہے۔

یاد رہے کہ دو دن قبل وزیر ریلوے شیخ رشید احمد نے کہا تھا کہ جناح ایکسپریس کے ساتھ اکانومی کلاس کے ڈبے لگائے جا رہے ہیں۔ انھوں نے کہا کہ ریلوے اسٹیشنز پر ایک ہزار دکانیں بھی بنائی جائیں گی۔

یہ بھی پڑھیں:  محکمہ ریلوے نے ریکارڈ ہدف حاصل کرلیا

وفاقی وزیر نے اس عزم کا بھی اظہار کیا تھا کہ 5 کی بجائے 3 سال میں ریلوے کا خسارہ ختم کر دیں گے، جو افسر یا ملازم 8 بجے ڈیوٹی پر نہیں پہنچے گا اس کی غیر حاضری لگائی جائے گی، فریٹ ٹرین کو 80 کی بجائے 40 گھنٹے میں تبدیل کیا گیا، پاکستان واحد ملک ہے جس نے پسنجر میں 10 ارب زیادہ کمائے۔

خیال رہے کہ محکمہ ریلوے نے 14 ماہ کے مختصر عرصے میں کارگو ٹرینیں چلانے کا بھی ریکارڈ ہدف حاصل کر لیا ہے، یہ کراچی ڈویژن کی بڑی کام یابی تھی جب اس نے 1 ہزار سے زائد کارگو ویگن لوڈ کرنے کا غیر معمولی ہدف حاصل کیا جن میں سے 1002 ویگن 15 مختلف مال گاڑیوں سے تعلق رکھتی ہیں۔

Comments

comments

یہ بھی پڑھیں