کراچی : جناح اسپتال کے باہر سے ایک نامعلوم عورت شیر خوار بچہ اغواءکر کے فرار ہوگئی،پولیس نے مقدمہ درج کرکے بچے کی بازیابی کیلئے کوششیں تیز کردی ۔
تفصیلات کے مطابق گیارہ ستمبر کے روز کورنگی کی رہائشی خاتون جناح اسپتال علاج معالجہ کے لئےآئی تو اس کے ساتھ ایک شیر خوار بچہ بھی تھا جس کا نام عمر بتایا جاتا ہے۔
مذکورہ خاتون نے اسپتال میں جانے سے پہلے بچہ اپنے دیور کے حوالے کیا اور اسپتال کے باہر انتظار کرنے کا کہا جہاں اس کے دیور سے ایک نقاب پوش خاتون نے بچے کو بہلانے کے بہانے گود میں لیا اور بچے کو لیکر فرار ہوگئی۔
پولیس نے جناح اسپتال کی سی سی ٹی وی کیمروں کی مدد سے نقاب پوش خاتون اور اس کے ساتھی کی تصاویر حاصل کرلی ہیں اور مقدمہ درج کرکے اغواء کار خاتون کی گرفتاری کیلئے کوششیں تیز کردی ہیں۔
