لاہور : جناح ہاؤس حملہ کیس میں پولیس نے پی ٹی آئی رہنما اسد عمر اور چیئرمین پی ٹی آئی کی بہنوں علیمہ اور عظمیٰ خان کی گرفتاری مانگ لی۔
تفصیلات کے مطابق لاہور میں انسداد دہشت گردی عدالت میں جناح ہاؤس جلاؤگھیراؤ کیس کی سماعت ہوئی ، پولیس نے اسد عمر ،چیئرمین پی ٹی آئی کی بہن علیمہ خان ، عظمیٰ خان کی گرفتاری مانگ لی۔
تفتیشی افسر نے بتایا کہ تینوں ملزمان تفتیش میں جناح ہاؤس حملہ کیس میں قصوروار پائے گئے ہیں، جے آئی ٹی نے تینوں ملزمان کو گنہگار لکھا ہے۔
تفتیشی افسر کا کہنا تھا کہ پولیس کو تفتیش کے لیے تینوں کی گرفتاری مطلوب ہے ، علمیہ خان کی موقع پر موجودگی پائی گئی، جس پر وکیل صفائی نے عدالت کو بتایا کہ علیمہ خان اور عظمیٰ خان مقدمے میں نامزد نہیں ہیں، ہمیں وہ بیان دکھائےجائیں جس کی روشنی میں ہمیں قصوروارقراردیا گیا۔
بعد ازاں انسداددہشت گردی عدالت نے جناح ہاؤس جلاؤ گھیراؤ کے کیس میں اسدعمر، علیمہ خان اورعظمیٰ خان کی عبوری ضمانت میں 16 اکتوبرتک توسیع کردی اور آئندہ سماعت پر وکلا سےدلائل طلب کرلیے۔
